Cenazeyê gerîlayê Yekîneyên Parastinê yên Rojhilatê Kurdistanê (YRK) Şahîn Sîrwan Namik (Helmet Helebce) ê ku sala 2023’yan li herêma Asosê di êrîşa balafirên şer de şehîd bûbû, li warê wî Helebceyê hat veşartin.
Cenazeyê gerîla Helmet Helebce ji Binarê Qendîlê ber bi warê wî ve hate şandin. Piştî cenaze gihişt bajêr li Goristana Gulan a Helebceyê merasîm hat lidarxistin. Azadîxwaz, welatparêz û malbata şehîd tevlî merasîmê bûn. Di merasîmê de wêneyê şehîd Helmet Helebce hatin hildan û dirûşmeyên “Şehîd namirin” hatin berzkirin.
Di merasîmê de Bekir Mecîd axivî. Mecîd sersaxî ji malbata şehîd re xwest û goty: “Şehîd Şahîn û hemû şehîdên Kurdistanê ji bo çarenûsa azadiya gelê xwe canê xwe feda kirin û şehîd bûn. Her kesê ji bo welatê xwe canê xwe feda bike li gorî hemû yasa û baweriyên civakî şehîd tê ragihandin.”
Bekir Mecîd soza şopandina rêya şehîdan dubare kir û wiha domand: “Birêz Ocalan dest bi pêngaveke nû kiriye ku êdî xwîna zarokên Kurd û Tirk neyê rijandin. Em spasiya vê peyamê û piştgiriya wê dikin. Ev jî nişana wê yekê ye Kurd ne tenê ji bo xwe ji bo hemû gelan aştî dixwaze. Mixabin dagirker tim dijminatiyê li gel gelê me dike.”
Mamostayê olî Mamoste Abdullah Abdulmecîd jî axivî û serfirazî ji bo hemû gelê Kurdistanê re xwest û got: “Her kesê ji bo ax û welatê xwe li dijî zilm û zordariyê xwîna xwe birijîne ew şehîde.”
Cenazeyê şehîd Helmet Helebce bi dirûşmeyên “Şehîd namirin” hat veşartin.
