Serkan Onûr Yilmaz ku li dijî Girtîgehên bi Tîpa Bîrê ku hewa û tav nakevin hundir, di rojiya mirinê de ye, di roja 317’an a berxwedana xwe de bi zorê sewqî nexweşxaneyê hate kirin. Destûr ji girtiyê siyasî Serkan Onûr Yilmaz re nayê dayin ku parêzerên xwe bibîne.
Ji parêzerên ku ji ber astengiya kêfî ya dozger nikare biçe hevdîtinan parêzera Buroya Hiqûqê ya Gel Doga Încesû li ser mijarê ji ANF’ê re axivî.
Doga Încesû amadekariyan dike ku giliyê dozger bike ku bi rengekî bêhiqûqî daxwaza hevdîtinê ya bi muwekîlê wan re asteng dike. Doga Încesû diyar kir ku Yilmaz li beşa mehkûman a li Unîteya Koroglû ya Nexweşxaneya Îzzet Baysal a Bolûyê tê ragirtin, hewldaneke destwerdanê ya bi zordarî lê nayê kirin, lê belê tecrîdkirî ye.
Doga Încesû ragihand ku muwekîlê wê Serkan Onûr Yilmaz bêyî îradeya wî rakirin nexweşxaneyê û got, “Gardiyanên ku dikevin hucreyê bi gotina, ‘Em ê hevdîtinê bi Serkan re bikin’ herdu girtiyên din ên li hucreyê li cihê hewastandinê asê dikin. Piştre jî Serkan bi xwe re dibin ku bi zehmetî dimeşe. Serkan ê ku bi zorê wî radikin nexweşxaneyê, hişyariyê dide ku eger bi zordarî dest lê bê werdan wê av û şekir jî êdî wernegire. Li ser vê yekê destwerdanek nehatiye kirin.”
‘DAXAWZA ME YA JI BO DESTÛRA HEVDÎTINÊ JI ALIYÊ DOZGERIYÊ VE HATE REDKIRIN’
Încesû ragihand ku piştî bi veguhestinê hesiyan yekser agahî dan parlamenteran û got, “Parlamenter li nexweşxaneyê geriyan, em parêzer jî roja Pêncşemê çûn Bolûyê. Ji bo dîtina muwekîlê xwe me ji dozger daxwaza destûrê kirin, lê belê daxwaza me hate redkirin. Roja Înê hem me hem jî malbata wî daxwaza hevdîtinê kir, lê belê ev daxwaza me jî ji aliyê dozgeriyê ve hate redkirin. Têkildarî vê astengiya kêfî nîqaşa me hate kirin û piştre em çûn dozgeriyê, li wê derê jî ji bo dayik û bavê Serkan destûra hevdîtinê hate dayin.”
‘SERKAN JI MALBATA XWE RE GOT, HETA KU BERSIV JI DAXWAZA WÎ RE NEYÊ DAYIN EW Ê DEST JI ROJIYA MIRINÊ BERNEDE’
Malbata ku bi kurê xwe Serkan Onûr Yilmaz re hevdîtin kir, anî ziman ku kurê wan gelekî kêm kiriye, lê moralê wî baş e û got, “Serkan ji malbatê re gotiye, daxwaza wî gelekî hêsan e û heta daxawza veguhestina hevalên wî bi cih bê anîn wê dest ji rojiya mirinê bernede. Xwestiye, tavilê bersiv ji daxwaza wî re bê dayin û gotiye, ‘Ew bawer dike ku bi ser bikeve’. Hevdîtina bi malbatê re jê re bûye moral.”
‘YILMAZ KU LI TÎPA BÎRÊ TECRÎDKIRÎ YE, DIXWAZE HEVALÊN WÎ JÎ BÊNE VEGUHESTIN’
Parêzer Încesû diyar kir ku Serkan Onûr Yilmaz bi xwe jî li Girtîgeha bi Ewlekariya Bilind a Antalyayê maye ku dixwaze hevalên wî jê bêne veguhestin, li wê girtîgehê tecrîdkirî bû û got, “Di encama greva birçîbûnê ya li hemberî vê tecrîdê de Serkan ji bo Girtîgeha bi Tîpa F a Bolûyê hate veguhestin. Lê belê 8 hevalên wî hîn di nava wan şert û mercan de hatin hiştin, lewma li ber vê yekê rabû û ji bo ew jî bêne veguhestin dest bi greva birçîbûnê kir ku piştre veguherand rojiya mirinê. Ji 8 girtiyên niha li Girtîgeha Tîpa Y a Antalyayê têne ragirtin 4 ji wan bi daxwaza veguhestinê di greva birçîbûnê ya bêdem de ne.”
‘BILA DAXWAZA MUWEKÎLÊ ME TAVILÊ BÊ QEBÛLKIRIN’
Încesû ragihand ku daxwaza muwekîlê wan gelekî hêsan e, dikare bi cih bê anîn û got, “Tenê divê 8 girtiyan ji bo girtîgehên cuda yên ne bi Tîpa Bîrê bêne veguhestin. Li şûna ku bersivê bidin vê daxwaza muwekîlê me, wî dibin nexweşxaneyê. Ev yek parastina jiyana wî nîne. Berevajî vê yekê mirina wî hîn nêz dikin. Eger mesele jiyan be bila daxwaza Serkan Onûr Yilmaz qebûl bikin, tavilê dest ji rojiya mirinê berde û bigihêje tenduristiya xwe. Ji bo vê daxwazê divê mirovek nemire, divê neyê kuştin. Şert û mercên li Girtîgehên bi Tîpa Bîrê bi rastî jî gelekî giran in.”
Încesû bang li baroyan jî kir ku di mijara Girtîgehên bi Tîpa Bîrê bikevin nava liv û tevgerê.
