Cenazeyê şervanên QSD’ê Ciwan Serêkaniyê (Faris Bû Omer) û Diyar Ereb (Amir Hîlal Hac) ên ku 22’ê Çile (2026) di bersivayîna êrişên çeteyên DAÎŞ-HTŞ’ê û dewleta Tirk de li bajarê Zirganê yê kantona Cizîrê şehîd bûbûn û Armanc Dirbêsiyê (Armanc Ebas) ê ku 18’ê vê mehê li bajarê Reqayê şehîd bûbû bi merasîmekê li Pakrewangeha Şehîd Rûsem Cûdî yê gundê Berkevirê yê Dirbêsiyê hatin veşartin. Endamên sazî û meclisên sivîl, Hêzên Ewlekariya Hundirîn, tevî bi sedan kesî beşdarî merasîmê bûn.
Merasîm bi deqeyek rêzgirtin dest pê kir. Piştre hevserokê Meclisa PYD’êya Dirbêsiyê Silêman Xelîl bal kişand ser êrişên çeteyên hikumeta demkî û got: “Êriş li dijî îradeya gelan û destkeftiyên şehîdan ne.”
Xelîl di axaftina xwe de soza şopandina rêya şehîdan da.
Endamê Meclisa Leşkerî ya Amûdê Berxwedan Amûdê jî diyar kir ku mîna li Siwêda û peravê kirine, dixwazin bi êriş û binpêkirinên agirbestê komkujiyan li dijî gelê Kurd pêk bînin.
Berxwedan Amûdê got: “Kurd ji her demê bihêztir e. Tu kes nikare îradeya wê bişkîne.”
Berxwedan Amûdê soza şopandina rêya şehîdan da.
Piştî axaftinan nasnameya şehîdan hatin xwendin û radestî malbatên wan hatin kirin. Cenazeyên şehîdan bi dirûşme û tilîliyên dayikan hat veşartin.
