Weke li seranserê cîhanê, li Rojhilat Navîn jî krîza avê gihîştiye asteke cidî. Li herêmê ku şer lê diqewime, sûcên giran ên mirovahiyê têne kirin. Netewe dewlet bi taybetî xurek û avê li ser gelan weke amûreke ambargoyê bi kar tînin.
Krîza avê ku li gelek welatan heye, bandoreke neyînî li jiyana mirovan dike. Ev rewş li Bakur û Rojhilatê Sûriyeyê jî bi şênberî tê dîtin. Ji ber ambargoiya ku Tirkiyeyê daniye ser çemê Firatê, ava paqij bi destê gelê herêmê nakeve û bi salan e ji ber çeteyan nikare ava ji bîrê jî werbigire.
Sekretera Kampanya Avê ya Hesekê Gulistan Îsa anî ziman ku pirsgirêka wan pirsgirêkeke polîtîk e û bang kir ku ev pirsgirêk li tevahiya cîhanê bê bihîstin û çareserî jê re bê peydakirin.
Gulistan Îsa ku beşdarî Forûma Avê ya Mezopotamyayê ya duyemîn bû, bal kişand ser krîza giran a avê ya li bakurê Sûriyeyê û destnîşan kir ku av êdî ne weke mafekî mirovî lê weke amûreke gefxwarinê li dijî sivîlan tê bikaranîn. Gulistan Îsa got, “Av mafê gelan hemûyan, mafê miletan hemûyan e. Lê belê îro mixabin li Sûriyeyê wergirtina ava paqij gelekî zehmet bûye.”
‘AV WEKE ÇEKEKÊ TÊ BIKARANÎN’
Gulistan Îsa ragihand ku ji ber qutkirina avê û êrîşên li ser stasyonên avê karê şaredariyan giran bûye û gel jî ji bo karibe ava paqij bi dest bixe neçar maye koç bike. Gulistan Îsa got, “Rewşa aboriyê ya gel gelekî nebaş e, derfetê xwe nîne ku gava paqij bikire. Ji ber vê jî mirov ya ava gemarî vedixwin ya jî malên xwe diterikînin. Nêzî çar sal in milyonek mirovên li Hesekê li hemberî nebûna avê têdikoşin. Êrîşên li ser stasyonên avê yên li herêmê gel di mijara avê de bê çare dike. Ji ber êrîşên çeteyan ên li ser stasyona avê, gel çar sal in hewl dide bê av jiyana xwe dewam bike. Sedema tevlîbûna me ya li vê forûmê ew e ku vê krîzê ji cîhanê re ragihînin. Em dixwazin welat hemû dengê me bibihîzin. Av mafê her kesî ye, divê mirov ji vî mafî bêpar neyên hiştin.”
‘NEBÛNA AVÊ MIROVAN NEÇARÎ KOÇBERIYÊ DIKE’
Gulistan Îsa diyar kir ku krîza avê êdî ne tenê pirsgirêka gel e, lê veguheriye meseleyeke polîtîk a navbera dewletan û got, “Ji bo avakirina Sûriyeya nû beriya her tiştî divê pirsgirêka avê çareser bibe. Ji ber nebûna avê mirov neçar dimînin ku koç bikin. Sîstema heyî vê koçberiyê teşwîq dike. Eger av, xizmet û enerjî bêne pêşkêşkirin mirov wê li warê xwe vegerin.”
‘PIRSGIRÊKA AVÊ NUQTEYEKE POLÎTÎK E’
Gulistan Îsa diyar kir ku krîza avê di heman demê de di şer de weke amûrekê tê bikaranîn û bi vî rengî dewam kir, “Li tevahiya cîhanê şerên mezin diqewimin û di van şeran de li ser sivîlan ku mexdûrê herî mezin in, sûcên şer têne kirin. Ambargoya xurekê tê danîn, av li ser tê birîn, mirov bê av têne hiştin. Ne rewşeke mirovî ye ku gelek bê av bê hiştin. Di mijara avê de dema ku em têkiliyê bi dewletan re datînin, timî ji me re dibêjin, ‘Ev pirsgirêk polîtîk e’. Halbûkî gel dixwaze di nava şert û mercên mirovî de bijî. Lê belê ev pirsgirêka avê ya ku veguheriye pirsgirêkeke polîtîk mirovan neçarî koçberiyê û jiyaneke bi tenduristiyeke nebaş dike.”
‘BÎR DI BIN KONTROLA ÇETEYAN DE NE’
Sekretera Kampanya Avê ya Hesekê Gulistan Îsa anî ziman ku av êdî ji çemên Dîcle û Firatê nayê û got, “Berê hebû, lê belê niha av ji çemên Dîcle û Firatê nayê. Çem têne astengkirin. Gel demekê av ji bîran dikişand, lê belê ev derfet jî êdî nema. Bîr jî di bin kontrola çeteyan de ne. Em êdî ava ji bîrê jî nikarin bi dest bixin.”
