Dewleta Tirk a qirker û faşîst bi hevkariya PDK’ê êrîş û dagirkeriya li ser başûrê Kurdistanê didomîne, der barê vê rewşê de mamoste Seryas Semîn û Ekrem Mihemed Elî ji ANF’ê re axivîn.
‘PDK HEVALBEND Û HEVKARÊ DEWLETA TIRK E’
Mamoste Seryas Semîn da zanîn ku dagirkeriya dewleta Tirk xwedî rehekî dîrokî ye û got: “Piştî Şerê Çaldêranê, 1514, Kurdistan di navbera Osmanî û Sefewiyan de tê parvekirin û heta niha jî ev dagirkerî berdewam e. Mixabin aliyê nêzîkî Tirkiyeyê PDK ye, ev yek jî rê ji bo dagirker vedike da ku sînorên başûrê Kurdistanê derbas bike. Di rastiyê de dewleta Tirk faşîst û netewperest e, tenê neteweya Tirk qebûl dike, Tirkan wek neteweyeke serdest dibîne. Ji bilî wê tu neteweyeke din qebûl nake. Armanca wê jî jinavbirina neteweya Kurd e.”
Her wiha Seryas Semîn got: “Mirov dikare wan êş û azaran bîne ziman ku bi serê gelê Kurd de tên, lê karê desthilata siyasî ya Herêma Kurdistanê ye ku ji aliyê dîplomasî û leşkerî ve pêşî li van dagirkeriyên Tirkiyeyê bigire.”
‘DEWLETA TIRK BENDÊN KONTROLÊ DANÎNE Û LÊPIRSÎNÊ JI XELKÊ DIKE’
Piştre mamoste Ekrem Mihemed Elî amaje pê kir ku dewleta Tirk a dagirker her roj gund û sînorên başûrê Kurdistanê bombebaran dike û wiha domand: “Tirkiye bi kûrahiya zêdetir ji 40 kîlometreyî axa Herêma Kurdistanê derbas kiriye, her roj êriş û dagirkeriyê pêk tîne, gundiyan ji gundên wan derdixe û xalên xwe yên kontrolê datîne da ku lêpirsînê ji xelkê bike, ji ber vê yekê xelk şehîd dibe. Heta niha jî Hikûmeta Herêma Kurdistanê ev yek şermezar nekiriye, ev jî tê wê wateyê ku di nav Herêma Kurdistanê de destek heye ku bûye hevkar, alîkariyê dike. Daxwaza me ji Hikûmeta Herêma Kurdistanê ew e ku van êrişan şermezar bike û dengê me bigihîne Hikûmeta Iraqê da ku vê dagirkeriyê rawestîne.”
Mamoste Ekrem her wiha ragihand ku dewleta Tirk a dagirker her roj jîngehê qir dike û got: “Dewleta Tirk her roj jîngeha Kurdistanê qir dike, dixwaze wê bike çol. Li van deveran dar hene ku gelek sal in hene û temenê wan digihîje 100 salî, Tirkiyeyê dest bi birîn û şewitandina wan daran kiriye, lewma ez tekez dikim ku divê Hikûmeta Herêma Kurdistanê û Hikûmeta Iraqê van êriş û dagirkeriyan şermezar bike, ji ber ku ev dagirkerî jîngeha Kurdistanê ber bi tunebûnê ve dibe.”
Mamoste Ekrem di dawiya axaftina xwe de bang li gel û saziyan kir ku li dijî van dagirkeriyên dewleta Tirk a dagirker rawestin û wiha got: “Ez ji mirovhez, sazî û jîngehhezan daxwazê dikim ku bertekên xwe li hemberî vê dagirkeriyê nîşan bidin, çi bi xwepêşandanan be, çi bi belavokan be. Çi dibe bila bibe, divê rê lê bê girtin, ji ber ku niyeteke Tirkiyeyê ya xerab û tirsnak heye, lewma pêwîst e em hemû bi hev re li dijî vê dagirkeriyê rawestin.”
