Rojnamevanên ku çalakiyên pîştî binçavkirina Serokê ÎBB’ê Ekrem Îmamoglû dest pê kirin, dişopandin, Yasîn Akgul, Alî Onûr Tosûn, Bulent Kiliç, Zeynep Kûray, Kûrtûlûş Ari, Gokhan Kam û Hayrî Tûnç bi hinceta ‘’muxalefeta li dijî qanûna civîn û xwepêşandanan’’ hatin binçavkirin û piştre jî hatin girtin. Rojnamevan duh sibehî jî hatin tehliyekirin.
Hevserokê Komeleya Rojnameyên Dîcle û Firatê (DFG) Selman Çîçek têkildarî girtina rojnamevanan a bi fermana Wezareta Karên Hundirîn a Tirk ji ANF’ê re axivî, ev yek anîn ziman:
‘’Li Tirkiyeyê her roj bêhiqûqiyeke nû rû dide. Ekrem Îmamoglû piştî ku dîplomaya wî bi awayekî derqanûnî hate betalkirin, hate binçavkirin û girtin. Dema ku em li naveroka dosyaya wî dinêrin em dibînin ku bi temamî ji şahidên veşartî û bêyî delîlan hatiye pêkanîn. Girtina Îmamoglû bû sedema nîşandana nerazîbûnên mezin. Di serî de Stenbol li gelek bajarên Tirkiyeyê têkildarî vê yekê çalakiyên mezin hatin lidarxistin.
Desthilatdariyê bi zext, tundîû êşkenceyê bersiv da van yekan. Kedkarên çapemeniyê ev êşkence ragihandin. Piştî ku dîmenên êşkenceyê ji aliyê rojnamevanan ve hatin ragihandin, welatiyan jî bertekeke mezin nîşan dan. Desthilatdarî jî ji vê yekê aciz bû û xwest kedkarên çapemeniyê di bin kontrola xwe de bigire. Di rojekê de 11 hevalên me hatin binçavkirin.
Ev hempîşeyên me hemû di qada navneteweyî de kar dikin. Gelekî karên serkeftî kirine û tên naskirin jî. Lê belê armanca binçavkirina veşartina êşkence û pêşîlêgirtina bertekên welatiyan bû. Ji ber vê yekê 11 hempîşeyên me hatin binçavkirin. Xwestin dengê heqîqetê qut bikin lê belê dengê rojnamevanan bi binçavkirinan qut nabe.’’
‘HIQÛQ ÊDÎ BI FERMAMAN TÊ SEPANDIN’
Çîçek da zanîn tevî ku rojnamevanên hatin binçavkirin, bi şertê kontrola edlî hatin berdan jî piştî demeke kurt derheqê wan de biryara girtinê hate dayîn û ev yek nîşan dide ku ev biryra bi fermanê hatiye girtin. Çîçek diyar kir ku êdî hiqûq bi fermanan tê sepandin û ev yek anîn ziman: ‘’Hevalên me yên rojnamevan bi fermanekê hatin girtin, em vê yekê wiha dibînin. Weke rojanamevanên ku xwe dispêrin Çapemeniya Azad, em ê rastiyan ragihînin. Her çi dibe bila bibe jî em ê êşkenceyên tên kirin û nerazîbûna welatiyan ragihînin. Tekane erka rojnamevanan ragihandina rastiyan e. Mixabin ji ber ku en van yekan dikin, em tên hedefgirtin. ‘’
‘EM BI MANTIQA HÎTLER RE RÛ BI RÛ NE’
Çîçek di dawiya axaftina xwe de detnîşan kir ku desthilatdarî hewl dide rojnamevanan krîmînalîze bike û got: ‘’Ev yek bi tenê ji aliyê desthilatdariyê ve nayê kirin, di heman demê de ji aliyê saziyên wê ve jî tê kirin. Wezareta Ragihandinê, li Tirkiyeyê weke Goebbelsa Hîtler kar dike. Em bi mantiqeke weke ya Hîtler ku her tiştî tune dihesibîne, qedexe dike re rû bi rû ne. Gelek hesabên medyaya dijîtal û malperên nûçeyan hatine qedexekirin. Bi vê yekê bes çapemeniyê krîmînalîze nakin, di heman demê de azadiya derbirînê jî tune dihesibînin. Êdî em dikarin bibêjin ku li Tirkiyeyê azadiya derbirînê bi temamî ji holê hatiye rakirin. Di azadiya çapenemiyê de di nava 180 welatan de di rêzên herî dawîn de cih digire.’’
