Meclîsa Ciwanan a Partiya Demokrasî û Wekheviyê ya Gelan (DEM Partî) têkildarî meşa ‘Em bi civaka demokratîk ber bi azadiyê ve dimeşe’ daxuyaniyek da çapemeniyê ku wê di navbera 1-4’ê Nîsanê de ji Amedê heta gundê Amara yê navçeya Xelfetî ya Rihayê pêk were.
Daxuyanî li avahiya DEM Partiyê ya Amedê hate dayin û parlamenterên DEM Partiyê Ceylan Akça û Bêrîtan Guneş jî tevlî bûn.
Endama Koordînasyona Jinê ya Meclîsa Ciwanan a DEM Partiyê Lorîn Aryen Tûrgût daxuyanî da û got, “Banga ‘Aştî û Civaka Demokratîk’ a Rêberê Gelan Abdullah Ocalan ku 27’ê Sibatê kir û rejîma tecrîdê ya tarî ya 43 mehan parçe kir, di serî de ji bo gelên Kurdistanê û Tirkiyeyê ji bo hemû gel û civakên bindest bû hêvî û serdemeke nû ya berxwedanê da destpêkirin.”
BANGA JI BO TEVLÎBÛNA LI MEŞÊ
Di daxuyaniyê de hate destnîşankirin ku ciwan wê ji aliyê îdeolojîk û çalakiyan ve bi rengê herî xurt li gel vê bangê bin û hate gotin, “Em bang li gelê xwe yê welatparêz û hevrêyên xwe yên ciwan dikin ku xwedî li Banga Aştî û Civaka Demokratîk derkevin, beşdarî meşa bi dirûşma ‘Em bi civaka demokratîk ber bi azadiyê ve dimeşin’ bibin. Werim em bi hev re 1’ê Nîsanê ji Amedê bimeşin Amarayê û bibin pêşengên jiyana bi rûmet.”
