Ji destpêka hilbijartina Donald Trump ya ji bo serokatiya Dewletên Yekbûyî yên Emerîkayê (DY) heya niha, hewlên nêzîkbûna ji bo Rûsyayê tên nîşandan û ev yek jî bû sedem ku hevsengiyên heyî yên di navbera her du dewletan de biguherin.
Serokê DYE’yê Donald Trump dibêje ku ew dixwaze dijminahiyên li Ûkraynayê bi dawî bike û ji bo ku li gel her du aliyan hevdîtinan pêk bînin, balyozên xwe şandin bajarê Riyadê.
DYE’yê, beriya hevdîtina li gel rayedarên Rûsyayê, roja Yekşemê heya saetên derengî li gel rayedarên Ûkraynayî hevdîtin pêk anî.
Wezîrê Parastinê yê Ûkraynayê Rustem Umerov diyar kir ku Ûkrayna ji bo aştiyeke adilane û mayînde hewl dide û got: “Hevdîtin bi erênî derbas bûn. Di serî de mijara enerjiyê, em li ser xalên girîng sekinîn.”
Washington û Kiev ji bo ku êrîşên li ser tesîsên enerjiyê kêm bibin, zêxtê li Rûsyayê dikin.
Ûkrayna dibêje ku ew ji bo agirbesteke ‘’giştî û bêyî şert û merc’’ amade ye.
Lê belê leşkerên Rûsyayê tevî ku windahiyên wan ên leşkerî zêde ne jî, hewl didin ku yekîneyên Ûkraynayê ji herêma sînor Kurskê derxînin.
Kremlin jî diyar dike ku wan li gel DYE’yê bes li ser bombenekirina binesaziyên enerjiyê lihevkirinek pêk aniye.
Nûnerê Taybet ê Trump jî got, ew li bendê ne ku di navbera keştiyên her du welatan ên li ser Behra Reş de agirbestek pêk were.
Rayedarê Emerîkî jî got: ‘’Girêdayî wê yekê jî em ê agirbesteke giştî pêk bînin.’’
Piştî ku Donald Trump weke serokê DYE’yê hate hilbijartin, têkiliyên xwe yên li gel Rûsyayê yê ji nû ve dan destpêkirin û polîtîkaya tecrîdê ya li ser Rûsyayê ya ji aliyê hêzên Rojavayî ve dihat meşandin, şikand.
Her wiha Trump piştî nîqaşa li gel Volodimir Zelenskiy a li Koşka Spî, alîkariya leşkerî ya ji bo Ûkraynayê da sekinandin.
Welatên Ewropayê jî ji ber ku di hevdîtinên têkildarî Ûkraynayê de hatin biçûkxistin, nerazîbûnên xwe nîşan dan.
Tê payîn ku roja Pêncşemê li Parîsê bi beşdarbûna Volodimir Zelenskiy û hevalbendên Rûsyayê hevdîtinek were lidarxistin.
