Şandeya Jinan a Bakur Bakur û Rojhilatê Sûriyeyê li Ewropayê hevdîtinên xwe didomîne. Di nava şandeyê de Rêvebera Meclîsa Jinan a Bakur û Rojhilatê Sûriyeyê Emîne Omer, Berdevka Meclîsa Jinan a Sûriyeyê Muna Yûsif, Berdevka Kombûna Jinan a Zenûbiya Şehrezad El Casim, Endama Koordînasyona Kongra Star Jiyan Hisên û Seroka Yekitiya Jinan a Suryan Corcêt Bersûm hene.
Corcêt Bersûm, ji ajansa me ANF’ê re têkildarê armanca hevdîtinan û rola girîng a jinan di siberoja Sûriyeyê de axivî.
Corcêt Bersûm, diyar kir ku jinên li Bakur û Rojhilatê Sûriyeyê bi lîstina roleke çalak di siberoja Sûriyeyê de daxwaza azadiyê dikin û got, “Civaka li Bakur û Rojhilatê Sûriyê û bi taybet jin roleke çalak di siberoja Sûriyê de dilîze. Her wiha di nava civaka navneteweyî jî roleke girîng dilîze. Daxwaza serxwebûna jinan dike, da ku bi rêya wê têkilîyên bi partî, parlemento û rêxistinên hiqûqî ava bikin. Ev jî dihêle ku mereqa civaka Ewropî li ser sîstema Rêveberiya Xweser û destkeftiyên wê zêde bibe. Ev bi giştî weke temsîla daxawazên civakê û pêkanîna wekehviyê ye.
Şandeya me temsîla hemû rêxistin û saziyên jin dike. Îro em li vir rastiyekê ji xebata bi salan pêşkêşî civaka navnetewî dikin. Li aliyeke din em çîrokên wan jinên ku rastî kiryar û şîdetê hatine vedibêjin û rêyên çareseriya aloziyan nîqaş dikin.”
REWŞA KOÇBERAN
Corcêt Barsûm, da zanîn ku rewşa kesên ku bi darê zorê hatine koçberkirin mijareke girîng di hevdîtinan de bû û got: “Dosyaya koçberan yek ji mijarên herî lezgîn û pêşîn e. Divê daxwazên kesên ku hatine koçberkirin werin çareserkirin û parastina wan were misogerkirin. Em ji civaka navneteweyî di vê mijarê de piştgiriyek mezintir dixwazin.”
AZADIYA JINAN Û DESTÛR
Corcêt Barsûm, da xuyakirin ku azadiya jinan yek ji mijarên herî girîng ên di rojeva şandeyê de ye û wiha domand, “Azadiya jinan ne tenê daxwazek çandî ye, ew projeyek veguherîna siyasî ye. Di destûra nû de divê hebûn û mafên jinan werin misogerkirin. Bi vî rengî em dikarin Sûriyeyek demokratîk, wekhev, bistiqrar bi dest bixin.”
Corcêt Barsûm, her wiha li ser beşdarbûna wan di çalakiyên çandî yên li Ewropayê de jî ev tişt gotin, “Em li Elmanya û Fransayê beşdarî festîvalê bûn. Ev çalakî ji bo pêşvebirina nasnameya gelê Sûriyeyê û ji bo ragihandina daxwazên me yên siyasî, wesîleyeke girîng e.”
ARMANC YEKÎTIYA JINAN E
Corcêt Barsom, diyar kir ku yek ji armancên herî mezin ên şandeya jinan yekîtiya di navbera rêxistinên jinan de ye û wiha dawî li axaftina xwe anî, “Nûnertiya hevbeş a jinên Kurd, Ereb, Suryanî û Asûrî peyamek bihêz ji bo Sûriyeyek demokratîk dişîne. Hevdîtinên me yên li Ewropayê derfetek dîrokî ne ku projeyên hevbeş bi rêxistinên jinan re pêşve bibin û yekîtiya jinan xurt bikin.”
