Jinan bi wesîleya 8’ê Adarê Roja Jinên Kedkar ên Cîhanê di serî de li Xarpêt, Colemêrg, Dîlok, Wan, Riha, Konyayê û gelek bajaran hatin cem hev. Hat diyarkirin ku di çalakiyan de bi banga Rêber Apo deriyekî ji aştiyê re hat vekirin û wiha hat gotin, “Ev derî têkoşîna me hemûyan a ji bo azadî û edaletê ye. Ev 8’ê Adarê wê deriyê azadî, edalet, wekhevî û çareseriya demokratîk a pirsgirêka Kurd ji me re veke.”
XARPÊT
8’ê Adarê li navçeya Dep ya Xarpêtê bi coş hat pîrozkirin. Li salona ku şahî lê hat lidarxistin pankartên “Em li dijî komkujiya jinan serî hildidin, em ji bo azadiyê dimeşin” û “Em neqediyan, em ê bi hev re tundiyê bisekinînin” hatin daliqandin û dirûşmên “Jin, jiyan, azadî” hatin berzkirin.
Şaredara Depê Songul Duzgun di şahiyêm de axivî, diyar kir ku 8’ê Adarê ne tenê cejna jinan e û anî ziman ku azadî wê bi destê jinan pêk were. Songul Duzgun got, “Em li her derê, li kargeh, li qadan, li şaredariyan, li kolanan, li malan ji bo parastina nasnameya xwe, têkoşîna xwe didomînin. Em ê bi paradîgmaya xwe ya li dijî vê sîstemê û pergala baviksalarî jiyanê xweştir bikin. Em ê şer û xizaniyê ji holê rakin. Hûn jin wê aştî û biharê bînin. Ger jin azad bibe civak jî azad dibe. Heta jin mafên xwe negirin li vê dinyayê edalet pêk nayê. Em dizanin ku jin wê têkoşîna xwe mezin bikin û mafên xwe bi dest bixin, edalet û aştiyê bînin vî welatî. Bijî têkoşîna me ya jinan. Bijî hevgirtina jinên me. bîjî 8’ê Adar’ê.”
COLEMÊRG
Bi pêşengiya TJA’yê li Colemêrgê li salona dawetê şahiyek hat lidarxistin. Gelek jin beşdarî şahiyê bûn. Koma Aryen derket ser dikê û bi staranên xwe beşdaran coşand. Hevseroka DEM Pariyê ya Bajêr Humeyra Armut 8’ê Adarê pîroz kir. Humeyra Armut got, 8’ê Adarê roja berxwedanê ye, 8’ê Adarê roja têkoşînê ye, 8’ê Adarê roja bihevrebûna jinanê ye. Ji bo vê jî em ê dîroka xwe û berxwedana xwe biparêzin.
Parlamentera Partiya DEM’ê ya Colemêrgê Oznur Bartîn bal kişand ser girîngiya 8’ê Adarê. Oznur Bartin anî ziman ku weke 8’ê Adarê û 21’ê Adarê rojên dîrokî derbas dikin û got, “Birêz Ocalan bi bangawaziyeke dîrokî îmze avêt. Piştî peyama dîrokî divê em jî bi hêztir xwe bi rêxistin bikin. “Jin û dayikên ku tu carî dest ji aştî û azadiyê bernedin, wê vê pêvajoya aştiyê hîn bêhtir bi rûmet bikin.”
Piştî axaftinan peyama Rêberê Gelê Kurd Abdullah Ocalan a 8’ê Adarê hat xwendin. Piştî peyam hat xwendin jinan bi stranên Koma Aryen govend gerandin.
WAN
Şaxa KESK’ê ya Wanê têkildarî 8’ê Adarê daxuyanî da çapemeniyê. Di çalakiyê de pankartên “Jin, jiyan, azadî”, “Çi bi serê Rojîn Kabaîş de hat?”, “Komkujiya jinê siyasî ye” hatin vekirin. Fîgen Çolakoglu diyar kir ku ew ê hesabê jinên hatine qetilkirin bipirsin, banga mezinkirina têkoşînê kir.
Daxuyanî bi dirûşmeyên “Jin, jîyan, azadî” bi dawî bû.
DÎLOK
Platforma Jinên Demokratîk a Dîlokê li Parka Kirkayakê ya navçeya Mezmaxorê 8’ê Adarê pîroz kir. Di çalakiyê de pankarta “Em ê ti carî dest ji têkoşîna xwe ya li dijî her cure tundî û zilmê bernedin” hate vekirin, dirûşmên “Jin, jiyan, azadî” hatin berzkirin.
Şahî bi berzkirina dirûşmeyan û gerandina govendê bi dawî bû.
RIHA
Platforma Jinan a Bajarê Rihayê ji Parka Novada heta Qada Topçu meşiyan. Jin bi cilûbergên xwe yên neteweyî û rengîn beşdarî meşê bûn, pankartên “Bi israr serhildan û azadî”, “Em ê bi têkoşîna xwe jiyanê azad bikin” û “Bijî hevgirtina jinan”, “Ji qirkirina jinê re na” û “Peymana Stenbolê bixin meriyetê” hatin vekirin. Di tevahiya meşê de jinan bê navber dirûşmên “Jin jiyan azadî” û “Ji şer re na, aştî niha” berz kirin.
Berdevka Demê ya Platformê Gul Fehîme Bînîcî di daxuyaniya çapemeniyê ya li qadê da axivî û bal kişand ser geşedanên dîrokî yên 8’ê Adarê û bal kişand ser girîngiya rojê.
MÊRSÎN
Li Mêrsînê bi pêşengiya Sendîkaya Tum Emekliler Şaxa Mêrsînêçalakî hate lidarxistin. Di çalakiyê de pankarta “Em ê berdêla krîzê nedin, Em ne kole ne, em jin in, em di îsyanê de ne” hate vekirin û bê navber dirêşm hatin berzkirin.
Sidiqa Gunduz daxuyaniya çapemeniyê xwend û 8’ê Adarê li hemû jinan pîroz kir.
SÊRT
Li Sêrtê jinan bi cil û bergên xwe yên gelerî 8’ê Adarê pîroz kirin û bê navber dirûşmên “Jin, jiyan, azadî”, “Bijî berxwedana Rojava” û “Bijî 8’ê Adarê” berz kirin. Hevseroka DEM Partiyê ya Sêrtê Rahşan Erslan, Hevseroka DBP’ê Naze Bulga û Hevşaredara Sêrtê Sofya Alagaş a ku qeyûm tayînî şûna wê kirin, axaftinên kurt kirin. Parlamentera DEM Partiyê Sebahat Saritaş bal kişand ser girîngiya banga Abdullah Ocalan a “Aştî û Civaka Demokratîk”.
Dengbêj Halîde derket ser dikê.
AGIRÎ
Şaxa ÎHD’ê ya Agirî bi wesîleya 8’ê Adarê Roja Jinên Kedkar ên Cîhanê daxuyaniyek da. Rêvebera ÎHD’ê Rûken Înan di daxuyaniya li Kolana Cumhuriyetê hat dayin de axivî, hevdîtinên aştiyê bi bîr xist û anî ziman ku jin di 8’ê Adara îsal de daxwaza xwe ya aştiyê bilind kirin.
Daxuyanî bi çepik û dirûşmeyan bi dawî bû.
ÎDIR
Bi pêşengiya TJA’yê li Îdirê ji bo 8’ê Adarê meş û şahî hat lidarxistin. Di şahiyê de koma muzîkê ya Koma Sorjian derketin ser dikê.
Hevseroka DEM Partiyê ya Navçeya Navendî ya Îdirê Fatma Kaya bal kişand ser perspektîfa Rêber Apo ya ji bo aştiyê û diyar kir ku Rêber Apo hêviyek mezin di civakê de afirandiye.
KONYA
Platforma Jinan a Konyayê di çarçoveya çalakiya 8’ê Adarê de ji Egîtîm Sena Konyayê heta Parka Gedavetê meşiyan. Di çalakiyê de pankarta “Em hebûn, em hene, em ê hebin” hate vekirin û dirûşmên “Jin, jiyan, azadî” û “Qetilkirina jinan polîtîk ye” hatin berzkirin.
Di daxuyaniyê de peyamên berfirehkirina têkoşînê hatin dayîn.
HATAY
Li Hatayê Platforma Jinan a Îskenderûnê li ber edliyeyê daxuyanî da. Di daxuyaniyê de pankarta “Em berxwedanê bi rêxistin dikin, ber bi azadiyê ve dimeşin” vekirin. Jinan gelek caran dirûşmeyên “Ji şer re na, aştî niha” û “Bijî hevgirtina jinan” berz kirin.
Endama Platformê Belgîn Ayraci diyar kir ku newekheviya zayendî roj bi roj zêde dibe û banga mezinkirina têkoşînê kir.
ÇEWLÎG
Li Çewlîgê jî jin li ber Mizgefta Uluyê li hev civiyan û heta xaçerêya PTT’ê meşiyan. Di meşê de dirûşma “Jin, jiyan, azadî” hat berzkirin. Endama Platforma Jinan a Çewlîgê Ceyhan Bariş Ogur bertek nîşanî “sala malbatê” ya ji hêla desthilatê ve hatiye îlankirin da û got, “Em bang li hemû jinan dikin ku li dijî sînorên serdest ên mêr û mêtingeriya kapîtalîst bi gotina ‘Em jin in, ne malbat in’ têkoşîna xwe ya ked û azadiyê mezin bikin.”
MELETÎ
Platforma Jinên Demokratîk a Meletî 8’ê Adarê li xaçerêya Jorîn a Emeksîzê bi coş pîroz kir. Di pîrozbahiyê de pankartên “Jin wê hem bihar û hem jî aştiyê bîne” û “Jin jiyan azadî” hatin hilgirtin, jinan bi stranên Kurdî demeke dirêj govend gerandin û gelek caran dirûşma “Jin jiyan azadî” berz kirin.
SEMSÛR
Platforma Jinan a Semsûrê ji avahiya Platforma Şaxên KESK’ê heta Qada Demokrasiyê meşiyan. Di meşê de pankarta ”Jin dimeşin, têkoşîna me mezin dibe” û dowîzên “Bijî hevgirtina jinan”, “Aştî niha” hatin hilgirtin. Di meşê de bênavber dirûşma “Jin jiyan azadî” hate berzkirin. Parlamentera DEM Partiyê ya Amedê Adalet Kaya got, “Mixabin jinên HDK’ê yên ji bo Civaka Demokratîk têdikoşin hatin girtin. TJA ku ji bo wekhevî û azadiyê têdikoşe bi tundiya polîsan re rû bi rû ye. Di fitrata me de berxwedan heye. JI bo ji şer re bêjin na me bingehek ava kir. Jin xwedî li banga 27’ê Sibatê ya birêz Abdullah Ocalan derketin. Aştî wê bi pêşengiya jinan pêk were.”
ENQERE
Jinan bi pêşengiya Platforma Jinan a Enqereyê li ber Metroya Kolejê kom bûn û dirûşmên “Jin jiyan azadî”, “Em bêdeng nabin, natirsin, guh nadin”, “Jin jiyan azadî” û “Dema jin tên qetilkirin polîs li ku bûn” berz kirin û ber Guvenparkê ve meşiyan. Polîsên ku deriyê Pira Mîthatpaşa girt, êrîşî jinan kir. Endama Komeleya Mafên Mirovan (ÎHD) Neylan Solmaz di êrîşa polîsan de ji ber derba ji serê xwe xwar ji ser hişê xwe çû. Tevî hemû astengiyên polîsan jî jinan li ber Pira Mîthatpaşa daxuyaniya çapemeniyê dan. Daxuyaniya Kurdî ji aliyê Berdevka Jinan a DEM Partiyê ya Enqereyê Nebahat Çalpan û ya Tirkî jî ji aliyê endama KESK’ê Zelal Angay ve hatin xwendin.
Di daxuyaniyê de hat diyarkirin ku li Tirkiyeyê 23 sal in desthilatdariya siyasî êrîşî destkeftiyên jinan dike, ev tişt hatin gotin: “Em ê li dijî şerên desthilatdariya mêr pêşengiya avakirina aştiya bi rûmet û mayînde bikin. Silav ji dayikên aştiyê yên pêşengên aştiyê ne û dayikên Şemiyê yên ku berxwedana xwe didomînin. Ji Şoreşa Jinan a Rojava re silav. Em ji bo li dijî şer aştiyê biparêzin li vir in.”
