Di 16’ê Nîsanê de, li Şamê di navbera Fermandarê QSD’ê Mazlûm Ebdî, Berpirsa Têkiliyên Derve ya Rêveberya Xweser Îlham Ehmed û Serokkomarê Hikûmeta Demkî Ehmed El Şera, Wezîrê Karûbarên Derve Esad Şeybanî û Şêwirmendê Serokkomariyê Ziyad El-Ayîş de civînek pêk hat.
Di civînê de mijarên siyasî û ewlehiyê yên li Sûriyeyê, her wiha pêvajoya entegrasyonê hatin nîqaşkirin. Pêkanîna Peymana 29’ê Çile û gavên ku werin avêtin hatin nirxandin. Di civînê de têkiliyên di navbera Rojava û Şamê û qonaxa niha ya pêvajoyê de jî hatin nîqaşkirin.
Li gorî çavkaniyên herêmî, pirsa Ehmed Şara ji Mazlûm Ebdî re, “Tu kengî têyî Şamê?”, balkêş bû. Hat diyarkirin ku Şara girtina rola Ebdî li Şamê wekî gaveke girîng dihesibîne.
Girtina wezîfeyek payebilind ji aliyê Mazlûm Ebdî li Şamê, ji bo pêkanîna peymanê û pêşveçûna pêvajoya siyasî girîng tê nirxandin.
RÊVEBERIYA HEVPAR A SÛRIYÊ DI ROJEVÊ DE YE
Nîqaşên di navbera QSD’ê û Şamê de li ser rêveberiyeke hevpar a Sûriyeyê berdewam dikin. Li gorî çavkaniyên herêmî, hikûmeta Şamê berê daxwaz kiribû ku QSD û Rêveberiya Xweser namzetek ji bo Wezareta Karûbarên Derve pêşniyar bikin. Ev yek wekî beşek ji pêvajoya entegrasyonê tê destgirtin.
JI BO YPJ’Ê LI FORMULEK DIGERIN
Di hevdîtinên şandeya YPJ’ê ya li Şamê de, mijara tevlîbûna jinan di artêşê û ewlehiya navxweyî de jî hate niqaşkirin. Her çend Şam, di vê mijarê de gumanên xwe hene jî, tê gotin ku alî li çareseriyeke hevpar digerin. Wekî din, tê destnîşankirin ku rêziknameyên destûrî pêvajoyek demdirêj in û ji ber vê yekê, niha pêşînî ji mijarên lezgîntir û bingehîntir re tê dayîn.
DIVÊ PÊNASEYA HEMWELATÎBÛNÊ JI NÛ VE BÊ NIVÎSANDIN
Di çarçoveya pêvajoya entegrasyonê ya li Sûriyeyê de çend mijarên girîng têne nîqaşkirin. Di nav wan de dayîna statuya fermî ji bo zimanê Kurdî, bikaranîna hevpar a Kurdî û Erebî di perwerdeyê de û naskirina dibistan û zanîngehên li Rojava ji aliyê Şamê ve hene. Her wiha, ji nû ve nivîsandina pênaseya hemwelatîbûn û nasnameyê tê plankirin.
Ji nû ve rêxistinkirina saziyên di bin bana Rêveberiya Xweser de ya di nav avahiyek dewletê de jî, di nav gavên bingehîn ên pêvajoyê de ye. Armanc ew e ku mekanîzmayên hevpar ji bo mijarên wekî tayînkirina parêzgaran, hilbijartinên şaredariyan û avakirina wezaretan werin avakirin.
MEKANÎZMAYÊN ABORÎ Û RÊVEBERÎ
Di warê aborî de, rêveberiya hevpar a tesîsên petrolê, gumrik, deriyên sînor û balafirgehan tê plankirin. Rojek diyarkirî nîne lê tê payîn ku Hikûmeta Demkî ya Sûriyeyê di nava vê mehê de têkildarê Deriyê Sînor ê Nisêbînê daxuyaniyek bide.
Vegera kesên ku ji ber şer koçber bûne jî mijarek sereke ye. Tê plankirin ku bi sedan malbat vegerin Efrîn û ji bo Serêkaniyê jî amadekarî û xebat hene.
REWŞA DÎLGIRTIYAN
Ji aliyekî din ve, çarenûsa bi sedan kesên ku di girtîgehan de dîlgirtî ne, weke pirsgirêkek cidî dertê pêş. Malbatên ku li bajarên cuda yên Sûriyeyê çalakî lidar dixin, daxwaza berdana zarokên xwe dikin.
