Hat diyarkirin ku tevî ku 48 sal li ser Komkujiya Meletî re derbas bûne, edalet pêk nehatiye û faîl nehatine darizandin. Nerazîbûn nîşanî polîtîkaya bêcezatiyê hate dayîn.
Di daxuyaniya Federasyona Elewiyên Demokratîk (FEDA) û Yekîtiya Jinên Elewî yên Demokratîk (DAKB) de, hate ragihandin ku Komkujiya Meletî hîna bi hemû aliyên xwe ve nehatiye ronîkirin û di bîra civakî de weke birîneke kûr maye.
Di daxuyaniyê de ev tişt jî hate gotin, “Her komkujiya hatî jibîrkirin, rê li ber yên nû vedike. Her sûcê bêceza tê hiştin, zilmê mezin dike û bêedaletiyê kûr dike.”
Di daxuyaniyê de hate bibîrxistin ku 17’ê Nîsana 1978’an paketeke bi bombe ji Şaredarê Meletî Hamit Fendoglu re hate şandin û di encamê de bûka wî û neviyê wî jî pê re, jiyana xwe ji dest dan û hate diyarkirin ku piştî vê bûyerê li Meletiyê êrîşên berfireh ên li dijî welatiyên Elewî destpê kirin.
Hat destnîşankirin ku di êrîşan de 3 jê zarok 8 welatiyên Elewî jiyana xwe ji dest dan, nêzî 100 kes birîndar bûn û 1000 mal û kargeh hatin hilweşandin û şewitandin.
Di daxuyaniyê de hate diyarkirin ku Komkujiya Meletî ne tenê komkujî û qirkirin, di heman demê polîtîkaya sirgûnê ye.
Di daxuyaniyê de her wiha komkujiyên Koçgirî, Dersim, Mereş, Çorûm, Madimak û Gazî jî hatin bibîrxistin û ev tişt hate gotin, “Heta ku rû bi rû mayîna paşerojê çênebe, aştiya civakî pêk nayê. Heta ku heqîqet dernekeve holê, edalet pêk nayê. Heta ku edalet pêk neyê, welatîbûna wekhev ne pêkan e.”
