Ji Wan, Amed û Îzmîrê 3 dayikên aştiyê di nava hefteyê de li Enqereyê bi gelek partiyên siyasî re li ser pêvajoyê hevdîtin kirin. MHP, AKP û CHP jî di nav de dayikan serdana gelek partiyan kirin, çarikên spî diyarî serok û hevserokên partiyan kirin, bal kişandin ser qîmet û girîngiya pêvajoyê û daxwazên xwe yên ji bo afirandina zemîneke qanûnî ya bi gavên şênber a ji pêvajoyê re û azadiya Rêber Apo parve kirin. Dayikan li gel vê yekê careke din bang li partiyan hemûyan kirin ku bêdudilî û fikaran piştgiriyê bidin pêvajoyê. Yek ji endamên heyeta Dayikên Aştiyê Afîfe Kartal li ser armanca çûyîna Enqereyê û girîngiya hevdîtinan ji ANF’ê re axivî.
‘XWÎN BI XWÎNÊ NAYÊ ŞUŞTIN’
Afîfe Kartal got, “Ji bo em helwesteke şênber li ser nîqaşên statuyê û girîngiya pêvajoyê destnîşan bikin em çûn Enqereyê. Daxwaza me ya destpêkê ew bû ku Birêz Abdullah Ocalan azad bibe û li dora maseyê karibe bi her kesî re hevdîtinê bike, vê pêvajoyê bi rê ve bibe. Me destnîşan kir ku heta Birêz Ocalan azad nebe ev pêvajo bi rengekî çêker nikare bimeşe.”
Afîfe Kartal bal kişand ser bûyerên piştî banga 27’ê Sibatê qewimîn û diyar kir ku rawestîna şer ji bo civakê gelekî girîng e. Afîfe Kartal got, “Bi banga 27’ê Sibatê re cenaze ji dayikên Kurd û Tirk re neçûn û cîgerê kesî neşewitî. Me bal kişand ser vê mijarê. Ev yek ji bo aştiyê gaveke gelekî girîng e. Me hêviya xwe careke din anîn ziman ku ev bang û aştî bi cih bê. Xwîn bi xwînê nayê şuştin, xwîn bi aştiyê tê şuştin. Em li pişt daxwaz û zarokên xwe ne.”
‘EV PÊVAJO JI BO GELAN FIRSENDEK E’
Kartal anî ziman ku li Enqereyê wan hevdîtin bi hemû partiyên siyasî re kirin û daxwaza ji bo sererastkirina qanûnî ya têkildarî gerîlayên çek danîne xistin rojevê. Kartal got, “Ev pêvajo divê êdî bi gavên şênber li ser zemîneke xurt bê danîn. Bİ taybetî me bal kişand ser girîngiya vê pêvajoyê û destnîşan kir ku firsendek e. Ev pêvajo ji bo hemû gelan firsendek e, divê em bi her awayî xwedî lê derkevin. Dema ku keça min jiyana xwe ji dest da, cenazeyê wê di nava kîsekî de dan me. Dema ku min ew dît, min got ‘Bila êdî mirov nemirin, ev bibe ya dawî, aştî bê’ û dua kir. Em ê heta dilopa dawî ya xwîna xwe ji bo aştiyê têbikoşin.”
‘JI BO AŞTIYÊ HER KES ERÊNÎ AXIVÎ’
Afîfe Kartal diyar kir ku partiyên siyasî bi erênî nêzî hevdîtinan bûn û got, “Wan jî bi çavekî erênî li daxwazên me nihêrîn, anîn ziman ku divê aştî ava bibe û pêvajo bi rengekî erênî bi pêş ve biçe. Bi taybetî me xwest, statu bê qebûlkirin û girtîgeh bêne valakirin. Me fikrê hemûyan wergirt, me li wan guhdarî kir, wan jî guh dan me. Tenê bi vî rengî, bi axaftinê em dikarin aştiyê ava bikin.”
‘JI GOTINAN DIVÊ DERBASÎ PRATÎKÊ BIBE’
Afîfe Kartal di dawiya axaftina xwe de destnîşan kir ku peyamên têkildarî aştiyê divê êdî derbasî pratîkê bibin û got, “Em li bendê ne ku daxwazên me tavilê derbasî pratîkê bibin. Her kesî têkildarî aştiyê tiştên erênî got, lê belê dem hatiye ku ev yek êdî ji gotinê derbasî pratîkê bibe.”
