Meşa “Em bi hêvî ber bi azadiyê ve dimeşin” ya ku Tevgera Jinên Azad (TJA) 1’ê Cotmehê da destpêkirin, dewam dike. Jinan 3 roj li pey xwe hiştin, piştî ku li Rihayê li gundê Rêber Apo Amarayê û navçeya Bêrecûkê meşiyan, derbasî Dîlokê bûn. Çalakvan li vir ji aliyê bi sedan kesan ve hatin pêşwazîkirin. Jinan bi coşeke mezin meşa xwe domandin. Di meşê de dirûşme û tilîlî bêdeng nebûn. Jin di heman demê de bi çîrokên xwe re dimeşin.
Jin êşên xwe, berdêlên ku dane û çîrokên têkoşîna xwe jî girtine cem xwe û ber bi Enqereyê ve dimeşin. Bi 7 daxwazan ji bo aştî li welêt çêbibe, bajar bi bajar digerin.
Jinên ku ji bo aştiya civakî û çareseriya demokratîk a pirsgirêka Kurd dimeşin, sedemê tevlîbûna xwe ya meşê wiha vedibêjin: “Êşên ku me kişandine, bila ti kesên din jiyan nekin.”
Yek ji van kesan dayika Fatma Uyar, Hatîce Uyar e. Fatma Uyar 5’ê Çileya 2016’an di dema berxwedana rêveberiya xweser de li Silopiyayê bi Sêvê Demîr û Pakîze Nayir re ji aliyê dewleta Tirk ve hate qetilkirin.
Hatîce Uyar anî ziman ku ji bo hîn zêdetir komkujî çênebin, ew beşdarî meşê bûye û bang kir ku dewlet di vê pêvajoyê de rû bi rûyê komkujiyên berê bimîne.
Hatîce Uyar got, “Yên berdêl dayîne û êş kişandine, pêwîste di vê pêvajoyê de çi ji destê wan were pêk bînin û berpirsyarî bigirin. Ev aştî ji bo me hemûyan şert e.”
AŞTÎ WÊ JI BO ME HEMÛYAN BAŞ BE
Hatîce Uyar diyar kir ku ew ti carî rûniştina li malê qebûl nake û ev tişt ragihand: “Aştî wê ji bo me hemûyan baş be. Em heya dawiyê piştgiriyê didin vê pêvajoya ku ji aliyê Birêz Ocalan ve hatî destpêkirin. Divê hemû gel dest bidin destê hev û ji bo avakirina aştiyê bêdeng nebin. Ev gel yan hate qetilkirin, yan hate girtin, yan jî hate sirgûnkirin. Divê ev êşkence bi dawî bibin, dewlet divê sûcên ku li dijî vî gelî pêk anîne bibîne û gavên samîmî bavêje.”
‘DIVÊ DAXWAZ BÊBERSIV NEMÎNIN’
Hatîce Uyar bilêv kir ku sala 2016’an keça wê hate qetilkirin û diyar kir ku ji bo kesên din heman êşan jiyan nekin, ew dimeşe. Uyar axaftina xwe wiha domand: “Em naxwazin ti kes bimire. Keça min hate qetilkirin, ez naxwazin keç yan jî kurê ti kesê were qetilkirin. Îro em evqasê aştiyê dixwazin, dewlet bi mehane ti gav neavêtiye. Divê daxwazên me bêbersiv nemînin, êdî divê dewlet gav bavêje.”
‘BAWERIYA AŞTIYÊ HÊZ DIDE MIN’
Hatîce Uyar anî ziman ku tevî hemû tiştên qewimîne jî ew dest ji daxwaza aştiyê bernade û ev bang li dayikên Tirk kir: “Eger ez tevî her tiştî îro li vir dibêjim aştî, dayika Tirk jî divê bêhincet vê bêje. Zêdetir rijandina xwînê, feyde nade ti kesê. Baweriya bi aştiyê hêz dide min. Ez bi vê baweriyê ji aliyekî welêt dimeşim aliyê din. Divê her kes vê gavê bavêje.”
