Dayikên Aştiyê yên Stenbolê li dijî êrişên li ser Rojava bênavber çalakiyan li dar dixe. Dayikên Aştiyê di 26ˊê Çilêyê Balyozxaneya Îngîltere, 27ˊê Çileyê Balyozxaneya Îsrailê daxuyanî dabûn. Dayikên Aştiyê îro jî li pêşiya Balyozxaneya Amerîkayê çalakî li dar xistin û bêdengiya hêzên navneteweyî şermezar kirin. Dayik li pêşiya balyozxaneyê kom bûn û dirûşmeyên “Bijî berxwedana Rojava”, “Jin Jiyan Azadî” û “Jin şer naxwazin aştiyê dixwazin” berz kirin. Li vir daxuyanî hat dayîn, daxuyanî ji aliyê Dayikên Aştiyê Rewşan Doner ve hat xwendin.
‘DAYIKÊN AŞTIYÊ LI DIJÎ KUŞTIN Û KOMKUJIYAN IN’
Rewşan Doner diyar kir ku li dijî polîtîkayên komkujiyê gelê Kurd li ber xwe daye û wiha axivî: “Em wekî Dayikên Aştiyê li dijî şer in. Li Rojhilata Navîn komkujî bi navê demokrasiyê pêk tê. Em wekî Dayikên Aştiyê li dijî kuştin û komkujiyan in. Jin hatin kuştin û li bazaran hatin firotin. Di vê serdemê de em ê çawa behsa demokrasiyê bikin? Têkoşîna gelê Kurd têkoşîna azadî û demokrasiyê ye. Li Kobanê û Hesekê komkujî pêk hatin. Zarokên gelê Kurd bi sermayê jiyana xwe ji dest dan. Ev şerma tevahî cîhanê ye.”
‘TEVAHÎ DEWLET TIŞTÊN KU DIKEVIN LI SER MILÊ XWE BIKIN’
Rewşan Doner anî ziman ku Rêber Apo di 27ê Sibata 2025’an de bangek dîrokî kir û got: “Ev banga birêz Abdullah Ocalan ji bo Rojhilata Navîn, Sûriye, Îran û Tirkiyeyê bû. Em dixwazin ku tevahî dewlet tiştên ku dikevin li ser milê xwe bikin. Ji ber me li ber xwe da me kirin 4 parçe. Wê demê Kurd mirî bûn lê îro rewşa gelê Kurd cuda ye.”
Piştî axaftinê çalakî bi dawî bû.
