Piştî Banga Aştî û Civaka Demokratîk gelek derdoran ji bo dîtina Rêber Apo yê li Îmraliyê serî li Wezareta Edaletê dan. Li gel rojnamevan, nûnerên saziyên civakî yên sivîl û beşên cuda yên civakê Meclîsa Dayikên Aştiyê jî heman serlêdan kir.
Dayikên Aştiyê diyar kirin ku divê pêvajo bi zelalî, ji dil û bi beşdariya civakî bimeşe û destnîşan kirin ku ji bo ragihandina nêrînên yekser ên li ser pêvajoyê ev serlêdan girîng e. Dayikên Aştiyê gotin, vekirina deriyên Îmraliyê li her beşên civakê wê pêvajoyê hîn bi lez bike û anîn ziman ku bi serketina pêvajoyê re wê karibin şîna xwe dînin ku taloq kirine.
‘DIVÊ PÊVAJO BI YEKALÎ NEMEŞE’
Hatîce Yaşar ragihand ku pêvajo bi yekalî tê meşandin, neavêtina gavên şênber hêviyan kêm dike û got, “Divê ev pêvajo bi yekalî nemeşe. Saleke ev pêvajo dewam dike lê belê gaveke bi tenê jî nehatiye avêtin. Hêviya me ne ji aliyê me ve lê ji aliyê dewletê ve kêm dibe.”
Hatîce Yaşar diyar kir ku girtiyên nexweş divê bêne berdan, dayik êdî negirîn û bal kişand ser êşa ku kişandine.
Hatîce Yaşar got, “Di vê pêvajoyê de min du zarokên xwe ji dest da, min gora yekî nedît. Bi sedan dayik ên weke min hene. Ez gora zarokê xwe dixwazim, dixwazim şînê dînim.”
Hatîce Yaşar ragihand ku aştî di heman demê de rêya girtina şînê ye û got, “Ev pêvajo ji ber vê yekê ji bo me gelekî girîng e. Aştî ji bo me tê wateya danîna şîna xwe ya taloqkirî ye.” Yaşar destnîşan kir ku divê pêvajo hîn bi biryar bimeşe û banga rakirina tecrîda li Îmraliyê kir.
‘VEKIRINA DERIYÊN ÎMRALIYÊ WÊ PÊVAJOYÊ XURTIR BIKE’
Hatîce Yaşar anî ziman ku deriyên Îmraliyê divê bêne vekirin û got, “Weke dayik, ji bo pêvajo ji dil bi rê ve biçe em dixwazin deriyên Îmraliyê bêne vekirin. Divê rojnamevan, dayik, siyasetmedar her kes karibe biçe Îmraliyê. Her kes pirsa xwe bike û bersiva van pirsan werbigire. Ev pêvajo tenê baweriyeke bi vî rengî dikare biafirîne.”
Meryem Tûran jî bi bîr xist ku pêvajoya 27’ê Sibatê destpê kir dewam dike, ji bo pêvajo bi rengekî erênî bi rê ve biçe di dema herî zû de divê gavên şênber bêne avêtin û got, “Gava destpêkê ya vê yekê jî rakirina tecrîdê ye, vekirina deriyên Îmraliyê ye.”
‘DIVÊ HER KES KARIBE HEVDÎTINÊ BIKE’
Meryem Tûran diyar kir ku muxatab Rêber Apo ye, lewma divê derfetên hevdîtinê bêne berfirehkirin û got, “Eger muxatab Birêz Ocalan e, wê demê divê pêşî li wî bê vekirin ku karibe bi her kesî re hevdîtinê bike û fikrê xwe parve bike. Dayik, rojnamevan, her beşên civakê divê karibin pê re hevdîtinê bikin.”
Hatîce Tûran anî ziman ku beriya bi mehan wan serlêdana ji bo hevdîtinê kirin, divê ev serlêdan bê qebûlkirin û got, “Eger hevdîtin pêk were û deriyên Îmraliyê bêne vekirin, ev pêvajo wê bi lez bimeşe û bigihêje armanca xwe.”
