Grev û protestoyên ji ber krîza aboriyê ya li Îranê hefteya derbasbûyî li paytext Tehranê destpê kirin, zêde dibin. Êrişên hêzên dewleta Îranê yên li hemberî gel jî giran dibin. Di çalakiyan de heta niha herî kêm 8 xwepêşandêr hatin qetilkirin, bi sedan kes jî hatin binçavkirin.
Alimê Kurd Şêx Murşîd Xeznewî têkildarî protestoyan daxuyaniyek da, têkoşîna gelê Rojhilat silav kir û peyama piştgiriyê da.
Xeznewî banga yekîtiyê li tevgerên siyasî yên li Rojhilat kir û got, “Gelê me yê Kurd ê li Rojhilat! Ez karên we, keda we, têkoşîn û berxwedana we silav dikim. Hûn ne xerîbê van taybetmendiyan e. Hûn parêzvanên nasnameya Kurd in, hûn şopdarên şoreşgeran e, hûn êş û hêviya 100 salî hildigirin, hûn neviyê Qazî Mûhammed in, hûn şopdarên komara destpêkê ya gelê Kurd in. Nexşerêya Rojhilata Navîn careke din bi xwînê tê xêzkirin. Gelên tenê yek bin dikarin di nava paşerojê de cihê xwe bigirin.
EM DI DEMEKÊ DE NE KU VEGERA WÊ NÎNE
Li gelê xwe, li xwişk û birayên xwe, li Rojava binihêrin. Birînên li Rojava kûr bûn, di navbera hêzên siyasî de nakokî hebûn lê belê dema ku biryara çareseriyê hate dayin partîzan bêdeng bûn; tenê qîrînek bilind bû: Kurd, Kurdistan û bijî xwişk û biratiya gelê kurd. Ev qîrîna yekîtiyê bû lîstikvanê sereke yê gel. Îro dora Rojhilat e. Bayê guherînê yê li Îranê zilm û zextê ji kokê radike û diavêje. Rejîma ku bi zilm û zextê desthilatdariya xwe dewam dike, bi dengê lingê şoreşgeran diheje. Dîrok destê xwe vedike lê belê ti carî yên bê biryar pêşwazî nake. Dem û mercên em tê de ne naşibe yên beriya niha. Em di demeke welê de ne ku vegera wê nîne. Demeke welê ne ku zarok û neviyên me ji me berpirsyariyê hevdî dikin.”
‘GELÊ ROJHILAT DIXWAZE WE DI BINÊ ALEKÊ DE BIBÎNE Û HELWESTEKE HEVPAR NÎŞAN BIDIN’
Şêx Mûrşîd Xeznewî destnîşan kir ku Rojhilata Navîn di pêvajoyeke dîrokî re derbas dibe, gelê Kurd jî divê vê firsendê ji dest bernede û got, “Bi taybetî PDK a Îranê, Partiya Komala ya Kurdistana Îranê, Partiya Komunîst a Îranê, Partiya Jiyana Azad a Kurdistanê (PJAK), Partiya Azadiyê ya Kurdistanê (PAK), hemû hêzên li Rojhjilat, komele û rêxistinan ji ber kar, ked, têkoşîn û berxwedana wan silav dikim û hurmetên xwe pêşkêş dikim.
Bi navê dayikên ku hêviya wan hûn in û li ber deriyê zindanan disekinin, bi navê ciwanên ku bi darvekirinê re rû bi rû ne, bi navê şehîdên ku wasiyetname ji me re hiştin bang li we dikim: Bila ev parçebûn êdî bi dawî bibe, bila ev parçebûn, daxuyaniyên cuda cuda bi dawî bibe. Gelê li Rojhilat dipirse bê hûn ê kengî di binê alekê de li hev bicivin û helwesteke hevpar nîşan bidin. Ji bo parastina gelê Kurd ê li Rojhilat, platform û eniyeke hevpar ava bikin, li dora maseyekê bicivin û bibin hêzeke mezin. Bi vî rengî hûn dikarin dagirkeran asteng bikin. Mafê herî biçûk ê gelê xwe bînin ziman, li hemberî lîstikên hêzên navneteweyî gelê xwe biparêzin.
HETA KU MIFTE HEMÛ LI HEV KOM NEBIN DERIYÊN AZADIYÊ VENABIN
Hûn dijminê hev nînin. Dijminê we ew hêz in ku xaka we dagir kirine. Hûn yekane kilîta parçeyan hemûyan e. Heta ku hemû kilîtên çar parçeyên Kurdistanê li hev kom nebin deriyên azadiyê jî venabin. Gelê me gaveke dîrokî ya hêjayî berxwedan û têkoşînê ji we hêvî dike. Ciwanên me yên li zindanê li benda peyameke we ne ku moralê wan bilind bike. Malbatên şehîdan li helwesta we dinihêrin, gelê me yê li sê parçeyên din ên Kurdistanê li helwesta we dinihêre, Kurdên li Rojhilat ya wê weke çiyayekî bisekinin ya jî wê vê firsenda zêrîn ji dest bidin. Li Rojhilat biryara yekîtiyê xewnek nîne û dayina vê biryarê di destê we de ye. Bijî Berxwedana Rojhilat, Bijî Kurd, Bijî Kurdistan.”
