Çalakiya Dayikên/Mirovên Şemiyê ku li aqûbeta xizmên xwe yên di binçavan de hatine windakirin û kuştin dipirsin û dixwazin kiryarên wan bên darizandin, di hefteya 1079’an de berdewam kir. Dayikên Şemiyê li Qada Galatasarayê bi qurnefîl û wêneyên kesên di binçavan de hatine windakirin kom bûn û ji bo Mahmut Dogan ê ku piştî binçavkirinê li Amedê hat qetilkirin edalet xwestin. Metna daxuyaniya çapemeniyê ji hêla Endama Komîsyona Girtîgehê ya Şaxa Komeleya Mafên Mirovan (ÎHD) a Stenbolê Sebla Arcanê ve hat xwendin.
Sebla Arcanê diyar kir ku malbata Dogan ku 32 sal in li edaletê digerin, dengê Qada Galatasarayê ne û got: “Mahmut Dogan (37) li Amedê dijiya û ajovanê taksiyê bû. Bavê çar zarokan bû. Di 27’ê Mijdara 1993’yan de, dora nîvro bi taksiya xwe ji mala xwe derket. Dema ku ew êvarê venegeriya malê, malbata wî bi Qereqola Polîsan a Rezanê ya nêzîkî mala wan re têkilî danî. Qereqolê malbatê ber bi Midûriyeta Polîsan ve şand. Polîsan ji wan re gotin ku Mahmut Dogan di bin çavavn de ye û heke bixwazin dikarin xwarinê ji wî re bînin. Piştî demeke kurt malbatê xwarin anî, lê ji wan re hat gotin, ‘Li vir kesek bi vî navî tune ye.'”
DOSYE HAT GIRTIN
Sebla Arcanê anî ziman ku malbatê ji bo fêrbûna çarenûsa Dogan careke din serî li Qereqola Polîsan a Rezanê daye û piştî 3 rojan qereqolê gazî malbatê kiriye û ji wan re gotiye, “Wesayîta ku we wekî diyar kiriye hatiye dizîn li li Qereqola Polîsan a Ovabag a Çinarê ye. Hûn dikarin biçin wê ji wir bînin.” Sebla Acanê bilêv kir ku li ser vê malbatê gotiğe “Me ji bo wesayîtê gilî nekiriye, me ji bo dîtina Mahmut Dogan serlêdan kiriye.” Sebla Arcanê got: “Lêbelê, tu encam bi dest neketiye. Wesayîta Mahmût hat dîtin, lê tu agahî jê nehat girtin. Di dawiya lêgerîna 63 rojan de, di 24’ê Çileya 1994’an de, cenazeyê Mahmut Dogan û Abdulselam Kizmaz ê windabûyî li Şikeftên Reçellik ên li gundê Bellitaş ê Çinarê hatin dîtin. Piştre malbatê giliyê sûc li Serdozgeriya Komarê ya Amedê kir. Dozgeriyê doz bi hinceta ku li nêzî cihê bûyerê teqînek çêbûye û di encamê de gelek kes mirine, girt.
Sebla Arcanê bi bîr xist ku 10 kesên ku wekî “Koma Karacadag” a rêxistinê dihatin nasîn, piştî operasyonên li dijî Hizbullahê di salên 2000’î de li Dadgeha Cezayê Giran a 5’emîn a Amedê hatine darizandin û got: “Yek ji bersûcan, Tahsîn Kara, diyar kir ku ew bi xwe di navbera salên 1992 û 1994’an de beşdarî kuştina 11 kesan bûye û ajovanê taksiyê yê bi navê Mahmut û Abdulselam Kizmaz di nav wan de bûn. Ev daxuyanî di tomarên dadgehê de cih girtin. Tahsîn Kara ku bi cezayê muebetê yê girankirî re rû bi rû bû, ji bo diyarkirina tenduristiya wî ya derûnî sewqî Nexweşxaneya Nexweşiyên Derûnî û Demarî ya Xarpêtê hat kirin. Dosyeya delîlan bi awayekî li nexweşxaneyê winda bû. Bi vê yekê re, dadgehê tenê 12 sal û nîv cezayê girtîgehê da Kara. Ev bûyer di medyaya sereke de bi sernavê ‘Dosyaya windabûyî îmamê Hizbullahê xilas kir’ hat ragihandin.”
Sebla Arcanê tekez kir ku serlêdanên malbatê yên der barê windabûna Dogan de bêencam mane û got: “32 sal in, kesên ku Mahmut Dogan winda kirine bi bêcezatiyê tên parastin. 32 sal in, dewlet erka xwe ya eşkerekirina vî sûcî û cezakirina sûcdarên wê bi awayekî dadperwerane pêk neaniye. Çiqas sal derbas bibin jî, em ê tu carî dev ji daxwaza edaletê ji bo Mahmut Dogan û hemû windahiyên xwe bernedin û ji her kesî re bibîr bixin ku divê dewlet di çarçoveya normên qanûnî yên gerdûnî de tevbigere.”
