Merasîma gerîla ya ‘Koma Aştî û Civaka Demokratîk’ ku 11’ê Tîrmehê li Silêmaniyeyê çekên xwe di agirdanê de şewitandin û bi vî rengî rê ji pêvajoya ‘Aştî û Civaka Demokratîk’ re xweş kirin, li Şengalê jî deng veda. Merasîm ji aliyê gelek derdoran ve li cih hate şopandin. Di nava beşdaran de şandeyek ji Şengalê jî hebû, ku ji endamên Rêveberiya Xweser a Şengalê û Tevgera Azadiyê ya Jinên Êzidî (TAJÊ) pêk dihat.
EV GAV WÊ AŞTIYÊ BI XWE RE BÎNE
Ji beşdarên merasîmê endama Koordînasyona TAJÊ Şemê Remo anî ziman ku weke gelê Şengalê, ew ji ber şewitandina wan çekan “xemgîn” bûn, ji ber ku wan çekan di dema fermanê de ew ji destê çeteyên DAÎŞ’ê rizgar kirin.
Şemê Remo diyar kir ku ji aliyê din ve ew kêfxweş bûn ku bi vê gavê re piştgirî ji banga Rêber Apo ya ji bo civaka demokratîk û aştîxwaz re hate dayin û rijandina xwînê û kuştinê ji holê radke. Şemê Remo got, “Em di wê baweriyê de ne ku ev gav wê aştî, wekhevî û biratiya gelan bi xwe re bîne.”
Şemê Remo her wiha destnîşan kir ku ew di wê baweriyê de ne ku ev pêngav wê heta dawiyê dewam bike û got, “Tişta ku ket ser milê Rêber APO û PKK’ê pêk hat. Êdî dema dewletê ye ku gavên berbiçav bavêje, heta ku ev pêngav misoger bibe.”
Şemê Remo anî ziman ku bi peyama bi dîmen a Rêber Apo re ew gelekî kêfxweş bûn û got, “Dema behsa serokatiya me dihat kirin, tenê zindan û tecrîd dihat bîra me. Lê dema ku peyam derket, her tişt bi qasî girîngiya xwe hate guhertin û dest bi pêvajoyeke nû hate kirin. Her çiqas em bi dîtina wî kêfxweş bûn jî, ya pêwîst niha ew e ku serokatî bi fizîkî jî azad bibe û bi awayekî azad bikare pêvajoya heyî heta serketinê bidomîne.”
GERÎLAYAN CIHÊ XWE DI DILÊ CIVAKA ÊZIDÎ DE KOLANDIYE
Endama Koordînasyona TAJÊ Neam Bedel ku di merasîmê de amade bû nerîna xwe wiha anî ziman: “Em di serî de silav û hezkiriyên xwe ji her kesî re dişînin ku di merasîmê de amade bûn. Bi taybetî dayikên gerîla re rêdikin” û bi vî rengî dewam kir: “Merasîma hate lidarxistin ji bo me weke dayikên Şengalê, hem kêfxweşî bû û hem jî xemgînî bû. Gelek ji wan gerîlayên ku çekên xwe îmha dikirin, di sala 2014’an de bi hawara Şengalê ve hatibûn û bi hezaran gelê me ji qirkirineke muhtemel rizgar kiribûn.
Aliyê din ê merasîmê û kêfxweşiyê ew bû ku êdî pêngava serokatî dayî dest pêkirin ber bi encameke dîrokî ve diçe. Êdî kuştin namîne, her kes dikare azad bibe û azad bijî.”
Neam Bedel anî ziman ku wan di merasîmê de ev her du hest jiyane û diyar kir ku wan xwestin gerîlayan ji nêz ve bibînin, wan hembêz bikin, ji ber ku di sala 2014’an de ew rizgar kirin.
Neam bedel got, “Gelek ji wan li ser axa Şengalê birîndar bûbûn. Lê mixabin, ji ber şert û mercên ewlehiyê me nikarîbûn zêde nêzî wan bibin. Me ji Şengalê diyarî ji wan re biribûn lê me nikarîbû wan diyariyan rasterast radestî wan bikin. Em li vir ji wan re heta dawiyê serketinê dixwazin û em ji wan re dibêjin we cihê xwe di nava dilê her ferdekî civaka Êzidî de kolaye, wê tu carî we ji bîr nekin û nedin ji bîr kirin jî.”
YA PÊWÎST HATE KIRIN, ÊDÎ DOR A DEWLETÊ YE
Neam Bedel her wiha diyar kir ku ket ser milê Rêber APO û PKK’ê pêk hat û got, “Dema ku Rêber APO bang kir, heta niha pêngav li dû pêngavê tên avêtin. Di pêngava yekem de, kongre hate lidarxistin û agirbesta yekalî hate ragihandin. Di wê demê de, tevî ku agirbest hatibû rawestandin jî, dewleta Tirk bi hemû hêza xwe êrişên xwe li ser herêmên parastina medya û qadên gerîla didomand. Pêngava herî dawî jî îmhakirina çekên 30 gerîlayan bû, weke desteka pêngavê û xurtkirina destê Rêber APO.”
Bedel diyar kir ku êdî ji niha û şûnde pêwîst e dewlet gavên berbiçav bavêje, lê heta niha dewletê gavên pêwîst neavêtine.
Bedel di dawiyê de got, gava pêwîst a ku were avêtin ew e ku tevahî girtiyên siyasî û di serî de Rêber APO werin azadkirin. Wê anî ziman ku heta ku ev gava berbiçav neyê avêtin, pêngav wê bi lez pêş nekeve. Ger dewlet bi rastî dixwaze ku aştî were û êdî her pirsgirêk di warê siyasî û civakî de were çareser kirin, pêwîst e ev gav rojek beriya rojekê were avêtin.
