Bertekên li dijî êrîşa ku li herêma Wadî El Deheb a bajarê Humusê yê Sûriyeyê li ser mizgeftekê pêk hat, berdewam dikin. Partiya Wekhevî û Demokrasiyê ya Gelan (DEM Partî), der barê êrîşê de daxuyaniyeke fermî weşand û êrîş şermezar kir.
Di daxuyaniyê de hate gotin: “Êrîşên bi vî rengî yên ku cihên baweriyê û sivîlan dikin hedef, nayên qebûlkirin. Vê êrîşê careke din nîşan da ku DAÎŞ û pêkhateyên mîna wê, ji bo gelên Rojhilata Navîn hîn jî gefeke cidî ne. Ev gef, ne tenê bi nêzîkatiyên ewlekariyê; lê belê li ser bingeha wekheviya gelan, azadiya baweriyê, beşdariya demokratîk û aştiyê bi têkoşîneke hevpar dikare were ji holê rakirin.”
DEM Partiyê di daxuyaniya xwe de tekez kir ku ew ê parastina avakirina Sûriyeyeke piralî, demokratîk û aştiyane ya ku hemû gel bêyî cudahiya nasnameya etnîkî, bawerî an jî mezhebî li ser bingeha hemwelatiya wekhev tê de bi hev re bijîn, bidomînin. Di daxuyaniya partiyê de ev xal hatin diyarkirin:
“Em tundî û êrîşên mezhebperest red dikin; em bawer dikin ku mezinkirina piştgiriya navbera gelan, diyalog û vîna jiyana hevpar berpirsiyariyeke dîrokî ye. Em sersaxiyê ji xizmên kesên di êrîşê de jiyana xwe ji dest dane re dixwazin û ji bo birîndaran jî şifaya xêrê dixwazin. Li dijî van êrîşan, têkoşîna hevpar a gelên herêmê û piştgiriya navneteweyî xwedî girîngiyeke jiyanî ye.”
