Bertekên partî û saziyên siyasî derbarê 6 pêşmergeyên di êrîşa Îranê de jiyana xwe ji dest dan berdewam dikin. Partiya Wekhevî û Demokrasiyê ya Gelan (DEM Partî), Serokê Yekîtiya Niştîmanî Kurdistanê (YNK) Bafil Talabanî û Komeleya Malbatên Şehîdan (KOMAW) têkildarî êrîşê daxuyanî dan.
Di daxuyaniya partiyê de ev xal hatin destnîşankirin: “Em vê êrîşê şermezar dikin, sersaxiyê ji malbatên kesên jiyana xwe ji dest dane û ji hemû gelê Kurdistanê re dixwazin. Em dizanin ku ev êrîş binpêkirineke aşkera ya serweriya siyasî ya Herêma Kurdistanê û îstîqrara herêmê ye. Ev êrîşên ku armanc dikin erdnîgariya Kurdistanê bikişînin nava şer û pevçûnan, dê tu carî negihîjin armanca xwe. Gelê kurd ji bo aştiyekê birûmet her dem têkoşiyaye û dê têkoşîna xwe bidomîne. Banga me ji bo hêzên navneteweyî û raya giştî ev e: Divê li hemberî van êrîşên li ser Kurdan helwestekê eşkere û bibiryar bê nîşandan. Em carekê din destnîşan dikin ku em ê piştgiriya xwe ya bi Herêma Kurdistanê re bidomînin.”
Serokê YNK’ê Bafil Talabanî li ser hesabê xwe yê fermî peyamek belav kir. Talabanî êrîş bi tundî şermezar kir û sersaxî ji malbatên pêşmergeyên jiyana xwe ji dest dane xwest û ji birîndaran re jî şifaya xêrê xwest. Talabanî wiha got: “Armanckirina hêzên Pêşmergeyên Kurdistanê binpêkirina serweriya xaka Iraq û Herêma Kurdistanê ye û vê êrîşê şermezar dikim. Daxwaz ji Hikûmeta Iraqê, civaka navneteweyî dikin ku bikevin nava hewldanan ji bo pêşîgirtina dubarenebûna her cûre êrîşeke wiha.”
Talabanî destnîşan kir ku ti demê Herêma Kurdistanê ne bûye parçeyek ji vî şerî û wiha domand: “Tim ketiye nava xebatên dîplomasî ji bo dîtina çareseriyeke aştiyane bi rêya gotûbêjê ji bo aramî li herêmê pêk were.”
KOMAW di daxuyaniya xwe de êrîş bi “xemgînî û hêrsek kûr” pêşwazî kir û diyar kir ku kesên ku jiyana xwe ji dest dane rûmet û berxwedana gel temsîl dikin. Di daxuyaniyê de hat destnîşankirin ku zilm û binpêkirinên mafên mirovan ên li dijî Kurdan berdewam dikin û êrîşên bi vî rengî ne tenê herêmekê, di heman demê de hêviya aştî û jiyana hevbeş jî hedef digirin.
Di daxuyaniyê de bang li civaka navneteweyî hat kirin ku bêdeng nemînin û bal kişand ser girîngiya hevgirtinê. KOMAW diyar kir ku ew ê têkoşîna xwe ya ji bo aştî, rûmeta mirovan û xwişk-biratiya gelan bidomînin.
