Daxuyanî bi îmzeya endamên komîsyonê yên DEM Partiyê Gulistan Kiliç Koçyîgît, Meral Daniş Beştaş, Hakki Sarûhan Olûç, Celal Firat û Cengîz Çîçek hate weşandin.
Di daxuyaniyê de hat ragihandin ku têgehên “Pêvajoya Tirkiyeyê ya bê teror”, “rêxistina terorê” û hw.d rast nehatiye dîtin.
Di daxuyaniyê de hate gotin, “Di vê çarçoveyê de li erdnîgariya me Tirk, Kurd, Ereb û gelek entîsîte û komên baweriyan ên cuda hene, têkiliya navbera gelan û baweriyan divê li ser bingeha demokratîk bê danîn.”
DEM Partiyê bal kişand ser banga Rêber Apo ya 27’ê Sibata 2025’an û destnîşan kir ku ew pêvajoya heyî weke “Pêvajoya Aştî û Civaka Demokratîk” pênae dikin.
Partiyê diyar kir ku ji aliyê binavkirina pêvajoyê ve di nava komîsyonê de lihevikrin nîne û got, divê pênaseya “Demokrasî, Xwişk-Biratî û Piştevaniya Mîllî” bê tercîhkirin.
Di metnê de hate ragihandin ku nabe meseleya Kurd bi têgeha “terorê” bê binavkirin û hate destnîşan kir ku pirsgirêk bi aliyên xwe yên siyasî, civakî, çandî û dîrokî meseleyeke maf û azadiyan e. Hate gotin, di demekê de ku hewl tê dayin dawî li pêvajoya şer bê anîn, bikaranîna têgehên yekalî wê tevkariyê li aştiya civakî neke.
DEM Partiyê diyar kir ku Rêber Apo yek ji aktorên girîng ê pêvajoyê ye û got, di raporê de zimanê ku têkildarî wî hatiye bikaranîn ne li gorî ruhê pêvajoyê ye.
Di daxuyaniyê de hate gotin, mafê zimanê dayikê mafekî bingehîn ê ji jidayikbûnê ye û hate ragihandin ku divê astengiyên li pêşiya Kurdî û zimanên din bêne rakirin û pirzimanî bê qebûlkirin.
Herî dawî jî hate destnîşankirin ku divê zimanê raporê yekalî nebe, pêvajoya aştiyê hem bi ziman hem jî bi rêbaza xwe hevgir be, xîtabî wijdanê civakî bike û di çarçoveyeke bi vî rengî de bê meşandin.
