Denîz Poyraz a ku 17’ê Hezîrana 2021’an di êrîşa li ser avahiya HDP’ê ya Îzmîrê de hatibû qetilkirin, di 4’emîn salvegera şehadeta xwe de bi meş û panelê hat bibîranîn.
Panela “Denîz Poyraz û Hevrûbûna Cinayetên Siyasî” li Navenda Çandê ya Turkan Saylan hat lidarxistin û bal kişand ser siyaseta tundiyê û bêcezatiyê.
Malbata Deniz Poyraz, nûnerên partiyên siyasî û rêxistinên civaka sivîl û gelek kes beşdarî panelê bûn. Parlamentera Partiya Wekhevî û Demokrasiyê ya Gelan (DEM Partî) a Amedê Adalet Kaya û parêzer Turkan Aslan axivîn.
Parêzer Turkan Aslan diyar kir ku pêvajoya lêpirsînê bi bandor nehat meşandin. Turkan Aslan destnîşan kir ku têkiliya kujeran bi paramilîteran re heye û bi bîr xist ku partiyên desthilatdar ên ku HDP’ê hedef girtin bingeha êrîşê amade kirin. Turkan Aslan bal kişand ser girîngiya banga Rêber Apo ya di 27’ê Sibatê de kir û got, “Divê hemû beşên civakê xwedî li vê bangê derkevin.”
Parlamentera DEM Partiyê Adalet Kaya jî bi bîr xist ku êrîşên bi vî rengî ji aliyê hêzên tarî ve hatine veşartin. Adalet Kaya diyar kir ku hevrûbûna bi komkujiyên siyasî re wê rê li ber ronîkirina bûyerên din ên tarî veke.
Piştî panelê, li ber navenda çandê daxuyaniya çapemeniyê hat dayîn. Di daxuyaniyê de pankarta “Soza me ji bo Denîz wê aştî be” û dirûşmeyên “Jin jiyan azadî” û “Şehîd namirin’ hatin berzkirin.
Hevseroka DEM Partiyê Fulya Erdogan êrîş bi tundî şermezar kir û anî ziman ku êrîş sûîqestek plankirî û siyasî ye. Fulya Erdogan wiha axivî: “Em ê xeyalên Denîz pêk bînin. Em di şexsê Denîz Poyraz de hemû mexdûrên tundiya siyasî bi bîr tînin; em diyar dikin ku em ê bi gelê xwe re siyaseta demokratîk biparêzin, edaletê ava bikin û heqîqetê bişopînin.”
Piştî daxuyaniyê, girse bi berzkirina dirûşmeyan heta Qada Gundogduyê meşiyan û qurnefîl avêtin deryayê.
