Banga dîrokî ya Rêber Apo li cîhanê deng veda. Dostên gelê Kurd jî bi peyama dîrokî re ji bo serdemeke nû bi kelecan in. Hêzên demokratîk û çep ên Ewropayê û rêxistinên maf-hiqûqê jî geşedanan pir ji nêz ve dişopînin. Li her çar aliyên cîhanê her kes piştgiriyê dide înîsiyatîfa dîrokî ya ku Rêber Apo pêş xistî.
Serokê Dadgeha Gelan a Daîmî ya Îtalyayê Gianni Tognoni û yek ji nûnerên Mafên Jinan a Elmanya ya NY’ê û Seroka İnternational Alliance of Women Marion Böker jî diyar kirin ku ji bo demokratîkbûn û çareseriya pirsgirêka Kurd, Rêber Apo bi pêngaveke pir mezin derket holê. Ji Medya Haberê Erem Kansoy pirs ji Tognoni û Boker kirin û wan jî bersiva pirsan dan. Tognoni û Boker destnîşan kirin ku di pêvajoyeke wiha krîtîk de kûrbûna pêvajoyê, girêdayî azadiya fîzîkî ya Rêber Apo ye.
VEGERA TIRKIYEYÊ YA LI MAFÊN MIROVAN, WÊ ŞANSÊ WÎ YÊ JI BO ENDAMTIYA YE’YÊ ZÊDE BIKE
Marian Boker diyar kir ku peyama Rêber Apo bandoreke mezin afirandiye û wiha pêde çû: “Ev tê wê wateyê ku Kurd êdî weke şaredar bên ser wezîfeyê jî, bikevin parlamentoyê jî, daxwaza wan a xwerêvebirinê û xebatên wan ên siyasî êdî weke ‘teror’ nayê dîtin û nayên cezakirin. Ev rewş wê bi temamî ji holê rabe û bi dawî bibe. Bi vî rengî dewleta Tirk wê li ser esasê berjewendî û daxwazên Kurd û Tirkan hîn bi rehettir hevkariyê bike. Li gorî min, ev wê ne tenê li Tirkiyeyê rê li ber aştiyê veke, di heman demê de wê zextê li hikûmeta Tirk bike ku êdî li Bakur û Rojhilatê Sûriyeyê Kurdan nekuje.
Divê Ocalan ji girtîgehê were derxistin û weke lîderê gelê Kurd divê bi gel û nûnerên xwe re baxive. Ji bo vê yekê divê qadeke azad hebe. Ez hêvî dikim ku dê were berdan. Ji ber ku Konseya Ewropayê jî di nav de, gelek saziyan ev daxwaz kir. Şert û mercên cezakirinê, ewqasî dirêj û xirab bû ku êdî divê hikûmeta Tirk wî berde. Dewleta Tirk divê li seranserî Tirkiyeyê dawî li her cure cudakariya xirab a li hemberî Kurdan bîne. Di heman demê de divê vê li welatên cîran; Iraq, Bakur û Rojhilatê Sûriyeyê, Îran û ji bo Kurdên li herêmên din ên cîhanê dijîn jî pêk bîne. Her wiha vegera Tirkiyeyê ya li mafên aştî û mafên mirovan, şansê wî yê ji bo endamtiya Yekîtiya Ewropa (YE) zêde bike.”
BANG PIR ZELAL E
Gianni Tognoni destnîşan kir ku divê dewleta Tirk bersiva banga dîrokî ya Rêber Apo bide û ev tişt diyar kir: “Bang pir zelal e. Lê belê ev bang di heman demê de daxwaza xetekê dike. Yanî bang pir girîng e, lê divê aliyê din jî ji bo avakirina şert û mercên demokratîk amade bin. Helbet hingî ku Ocalan girtî be, ev pêvajo bi encam nabe.
Berdana Ocalan, ne tenê ji bo Tirkiye û Rojava, ji bo hemû herêma Rojhilata Navîn jî girîng e. Şûna ku pevçûn weke quralekê bên qebûlkirin, divê aştî weke çarçove û perspektîfekê were pêşkêşkirin. Ocalan ev bang kiriye. Divê êdî dewlet bersivekê bide.”
