Jin bi daxwazên berxwedan, azadî û aştiyê 8’ê Adarê Roja Jinên Kedkar ên Cîhanê pîroz kirin. Di çalakiyan de bal kişandin ser banga Rêber Apo ya 27’ê Sibatê û banga gavavêtinê li dewletê kirin.
DÎGOR: Li avahiya DEM Partiyê ya navçeya Dîgor a Qersê bi dirûşmeya “Em bi têkoşîna azadiya jinê aştiyê bi rêxistin dikin” şahî hat lidarxistin. Hevseroka DEM Partiyê ya bajêr Arzû Savaş Derman diyar kir ku berxwedana jinan a li dijî şeran wê bidome û got, “Ji bo jinan şer tê wateya xizanî, bêkarî, tundiya mêr, îstismarkirina beden û kedê, koçberî û penaberiyê. Ji ber vê yekê em jin li dijî şer radiwestin.”
Parlamentera DEM Partiyê ya Mêrdînê Salîha Aydenîz destnîşan kir ku 8’ê Adarê serhildaneke li dijî komkujiyên jinan e. Salîha Aydenîz bal kişand ser banga dîrokî û got, “Birêz Ocalan bi cesareteke mezin banga avakirina civaka demokratîk kir. PKK’ê jî bersiv da vê bangê. Divê êdî dewlet û mûxalefet bikevin nava liv û tevgerê. Ji bo birêz Ocalan xebatên xwe yên di vê mijarê de bidomîne divê şert û mercên azad bên afirandin. Divê her kes di vî warî de erka xwe pêk bîne.”
Şahî bi stranên Koma Aryen bi dawî bû. Jin bi dirûşmeyên “Jin, jiyan, azadî” ji avahiya navçeyê heta ber şaredariya Dîgorê meşiyan.
AMED: Komeleya Çand, Huner û Wêjeya Jinê (KASED) pêşangeha “Jin û Kolan” a ku berhemên Bahar Mosleh tê de cih digirin vekir. Endama KASED’ê Neşe Toprak di axaftina xwe de Jîna Emînî ya ku li Tehranê hat qetilkirin bi bîr anî û bal kişand ser têkoşîna jinan a li dijî pergala serdest a mêr. Hunermend Bahar Mosleh got, “Berhemên min cîhana hundirîn a jinan û têkoşîna wê ya li dijî zîhniyeta baviksalarî nîşan dide. Ev jî rêbazeke din a berxwedanê ye.”
RIHA: Meclisa DEM Partiyê çûn Girê Miraza. Hevseroka DEM Partiyê ya Rihayê Sema Aişeoglû di axaftina xwe de got, “Em berxwedana hemû jinan bi taybet jinên Rojhilata Navîn silav dikin. Em careke din dibînin ku 12 hezar sal berê rola jinan lîstyiye niha dîsa dilîzin.”
EDENE: Platforma Jinan Piştî daxuyaniya li ber PTT ya Cumhuriyetê ji jinên girtî re kartên piştgiriyê û pirtûk şandin. Parêzer Sevîl Araci banga aştî û civaka demokratîk a Rêber Apo bi bîr xist û banga beşdarbûna meşa 8’ê Adarê ku ji Pira Kasim Gulek heta Qada Ûgûr Mûmcû pêk were, kir.
