Macron di daxuyaniya çapemeniyê ya hevpar de got: ‘’Yek ji girîngtirîn perçeyeke hevkariya me, mezinkirin û sîstematîkkirina têkoşîna li dijî Hîzbûllahê, kêmkirina bandora Îran û wekîlên wê ya li herêmê û dabînkirina aramîya Sûriye û Lubnanê ye.’’
Serokkomarê Fransayê Emmanuel Macron beriya niha jî geşedanên erênî yên têkildarî têkoşîna li dijî tiryakê silav kiribû.
TÊKOŞÎNA LI DIJÎ TIRYAKÊ
Macron, bal kişand ser madeya hişbir captagonê û ev yek anîn ziman: ‘’Li gel welatên cînar, weke tê zanîn di hilberîna madeya captagonê de kêmbûneke cidî pêk hat ku ew yek ji fînansmana rejîmê ye. We jî bi kêmkirina hilberînê û têkoşîna li dijî vê belayê sozên xwe yên têkildarî vê mijarê bi cih anîn. Girêdayî vê yekê divê Sûriye li herêmê rola xwe tam bilîze û piştevaniya dabînkirina aramiyê bike.’’
REWŞA LI SÎNORÊN LUBNANÊ
Her wiha Serokkomarê Fransayê Emmanuel Macron, bal kişand ser başbûna rewşa li sînorên Sûriye-Lubnanê jî û anî ziman ku bi pêşkêşkirina arşîv û tecrûbeyên xwe yên di vî warî de ew amade ye ku ji bo destpêkirina muzakereyên têkildarî diyarkirina sînorên hevpar ên di navbera Sûriye-Lubnanê de bibe alîkar.
Macron got, “Ji bo vê mijarê beriya çend hefte derfeta hevdîtinê çêbû.”
Di dawiya meha Adarê de, Serokkomarê Lubnanê Joseph Aoun li Qesra Elysee hate pêşwazîkirin. Di hevdîtinê de ewlehiya li ser sînorê Lubnan-Sûriye hate nîqaşkirin. Her du serok bi Şera re bi vîdeo konferansek pêk anîn. Mijar şer û pevçûnên di navbera hêzên Sûriyê û eşîrên Lubnanê yên li ser sînor de bû.
Macron got, “Ev koordînasyon, ji bo Sûriye careke din nebe kordona navbera Îran û Hîzbûllahê û agirbesta li Lubnanê bê parastin pêwîstiyeke.”
DIVÊ BERPIRSÊN KOMKUJIYA DURZÎ Û ELEWIYAN BÊN DARIZANDIN
Macron di civîna çapemeniyê de ji Şara xwest ku “Ji bo parastina hemû Sûriyeyiyan, kok, ol, bawerî û nêrîna wan çi dibe bila bibe, her tişt bike.”
Serokkomarê Fransayê Macron, destnîşan kir ku divê berpirsyarên êrîşên li dijî Durzî û Elewiyan bên darizandin û bang li Yekîtiya Ewropayê kir ku van sûcdaran ceza bike.
CEZAYÊN ABORÎ
Emmanuel Macron, diyar kir ku eger HTŞ’ê ya ku ji meha Kanûnê ji dema têkçûna Beşar Esad û vir ve li Sûriyeyê desthilatdar e istîqrarê li welêt pêk bîne, wê cezayên aborî yên Ewropayê gav bi gav bên rakirin.
MACRON NERAZÎBÛN NÎŞANÎ ÊRÎŞÊN ÎSRAÎLÊ DA
Emmanuel Macron, diyar kir ku êrîşên Îsraîlê ya li ser Sûriyê “pratîkeke xirab” in û got wê “ewlekariya Îsraîlê” misoger neke.
Macron got, “Dema ku mijar dibe bombebaran û êrîş, li gorî nêrîna min dibe pêkanînên xirab. Bi binpêkirina yekparçetiya axa cîranên xwe re hûn nikarin ewlekariya welatê xwe pêk bînin.”
Serokkomar Emmanuel got, “Rêbaza ku îro tê bikaranîn ne ew rêbaz e ku dê ewlehiya demdirêj a Îsraîl û gelê wê pêk bîne. Rêya herî rast jî xurtkirina lihevkirinê ye.”
ŞERA DANÛSTANDINÊN NEYEKSER BI ÎSRAÎLÊ RE PIŞTRAST KIR
Şara jî got “Danûstandinên neyekser” bi Îsraîlê re “bi rêya navbeynkaran hene da ku rewşa heyî bixin bin kontrolê.”
