Pîrozbahiya Newrozê li Parka Newrozê ya li navçeya Rezan a Amedê pêk tê.
Ji bo pîrozbahiya ku bi dirûşmên ‘Rêbertiya Azad Civaka Demokratîk’ û ‘Civaka Demokratîk ji bo Azadiyê’ tê lidarxistin, ji serê sibehê ve ji bajar, navçe, bajarok, gundên li derdorê bi hezaran kes bi rê ketin.
Coşa Newrozê li çar aliyên bajêr belav bûye û bi deh hezaran kes ber bi qada Newrozê ve herikîn.
Têketina qada Newrozê ya ji 6 noqteyên kontrolê didome. Ciwan, li gelek noqteyan bi kortejan têketin qada Newrozê. Gelek caran dirûşmên “Bê Serok jiyan nabe”, “Bijî Serok Apo” û “Girtiyên siyasî rûmeta me ne” hatin berzkirin. Piraniya welatiyan bi cil û bergên Kurdî beşdarî pîrozbahiyê bûne.
Girseya ku li aliyê Hala Nû kom bûn, demeke dirêj govend gerandin. Coşa jin û ciwanan rê li ber dîmenên rengîn vekir. Yek ji qada din a ku welatî têdikevin qadê jî Bûlwara Qamişloyê ye. Jinên ku cil û bergên Kurdî li xwe kirin, bi dirûşma “Jin, jiyan, azadî” meşiyan. Ji 7 salî heta 70 salî ji her temenan gel tev li pîrozbahiyê bûye. Dayikên Aştiyê jî bi dirûşma “Bijî Newroz, Bijî aştî” têketin qada Newrozê. Ciwan jî bi dayikan re meşiyan û dirûşma “Bijî Dayikên Aştiyê” berz kirin.
Li ber deriyan gelek welatî li bendê ne ku derbasî qadê bibin. Li hinek noqteyên kontrolê polîsan dest danîn ser flamayên bi rengên kesk, sor û zer. Vê yekê rê li ber bertekan vekir. Ji ber ku gelek kes di dorê de ne, welatiyên kal neçar dimînin ku li wir bisekinin.
Herikîna gel a ji her çar aliyên bajar ve ya ber bi qadê ve didome û qad tije bûye. Bi deh hezaran kesên têketin qadê li ber dahol û zirneyan û stranên Kurdî govendê digerînin.
Posterên Rêber Apo li qadê tên gerandin û coşa li qadê her ku diçe mezintir dibe.
