Hevserokê Şaxa Komeleya Hiqûqnasên ji bo Azadiyê (OHD) ya Stenbolê Îshak Demîrel da zanîn ku banga bi bîmen ya di 9’ê Tîrmehê de hate weşandin xwedî girîngiyeke dîrokî ye û got ku bang ji bo gelan bûye çavkaniya berxwedêriyê. Demîrel têkildarî banga Rêber Apo ya dîrokî ji ANF’ê re axivî.
‘DENG Û DÎMEN JI GELAN RE BÛN ÇAVKANIYA BERXWEDÊRIYÊ’
Îshak Demîrel di destpêka axaftina xwe de bal kişand ser girîngiya banga bidîmen û ev yek anîn ziman: ‘’Banga bidîmen hem ji aliyê hîsîyata manewî ve hem jî ji aliyê naveroka xwe ve xwedî girîngiyeke dîrokî ye. Ev vîdeo hem ji gelên ku bi salên dirêj e dixwezin dengê Birêz Abdullah bibîhîzin re bûye çavkaniyeke berxwedêriyê hem jî nexşerêya pêvajoya ku berdewan dike nîşan daye. Ev vîdeoya 7 deqeyî ya piştî 27 salan hatî, nîşan dide ku alî li gorî serdemên berê bi awayekî cidîtir nêz dibin. Helbet em nikarin vê yekê ji geşedanên ku li Rojhilata Navîn rû didin, cudatir binirxînin.’’
‘DIVÊ DEMILDEST LI MECLÎSÊ KOMÎSYON WERE AVAKIRIN’
Demîrel da zanîn ku mijarên çekdanîn û siyaseta demokratîk di banga Rêber Apo de cih digirin gelekî girîng in û got: ‘’Piştî ku Birêz Ocalan da zanîn ku ew li pişt banga xwe ya 27’ê Sibatê ye bes ne ji bo gelê Kurd bangeke gerdûnî kir û anî ziman ku aşitiya ku wê li Tirkiyeyê pêk were wê di çarçoveya Modernîteya Demokratîk de bandoreke gerdûnî hebe.
Di banga bi dîmen de tê dîtin ku danîna çekan a bi dilxwazî û destpêkirina serdema nû ya bi siyaseta demokratîk weke argumanên sereke ne. Hêmanên sereke yên di banga Aşitî û Civaka Demokratîk û banga bidîmen de cih hatine diyarkirin aliyên siyaseta demokratîk û hiqûqî ne. Piştî danîna çekan pêngavên ku divê eşkeretirîn werin avêtin hene. Girêdayî vê yekê divê demildest li Meclîsê Komîsyona ku tê behskirin, were avakirin. Ji ber ku em qala civakîkirina pêvajoyê dikin divê komîsyona ku wê were avakirin bi rêyên demokratîk û beşdarbûna hemû partiyan were avakirin. Divê ev komîsyon xwedî raye û berfireh be, divê pirsgirêkên heyî tespît bike û li gorî wê guherînan pêk bîne. Ger hewce bike divê TBMM nekeve betlaneyê û dest bi xebatên avakirina komîsyonê bike.’’
‘DIVÊ DEWLET PÊNGAVÊN CIDÎ BIAVÊJE’
Demîrel destnîşan kir ku divê êdî dewlet pêngavên cidî biavêje her wiha diyar kir ku divê di yasayan de guherîn pêk werin û girtiyên ku înfaza wan hatiye şewitandin werin berdan û got: ‘’Naskirina siyaseta demokratîk û aliyên hiqûqî yên banga Aşitî û Civaka Demokratîk ku egerên bangê ne divê di xebatên komîsyonê de hêmanên sereke bin. Tê dîtin ku pêvajo bi yekalî nameşe. Divê dewlet jî ji niha û pê ve pêngavên pratîk û şênber biavêje. Girêdayî vê yekê li gel têgeha welatibûnê û perwerdeya bi zimanê dayîkê çêkirina Qanûna Bingehîn, kanûna înfazê, qanûnên cezayî ûçêkirina qanûnên din a di çarçoveya çarçoveya hiqûqa azadiyan de ji aliyê naskirina aliyê hiqûqî ve gelekî girîng e. Li rex van yekan di serî girtiyên nexweş û yên înfaza wan hatiye şewitandin divê hemû girtiyên siyasî werin berdan.’’
‘TIŞTÊN KU DIVÊ JI ALIYÊ DEWLETÊ VE WERIN DIVÊ DEMILDEST WERIN KIRIN’
Demîrel diyar kir ku Rêber Apo weke takekesî daxwaza azadiya xwe nake û li hemberî vê yekê êdî sepandina mafê hêviyê gelekî girîng e û got: ‘’Birêz Abdullah Ocalan da zanîn ku ew azadiya xwe ya şexsî weke pirsgirêkekê nabîne. Her wiha sepandina mafê hêviyê jî ku ev demeke dirêj e di rojevê de û ji aliyê pêvajoyê ve jî mijareke gelekî girîng e. Tevî biryara Komîteya Wezîran jî mafê hêviyêli Tirkiyeyê bi israr nayê sepandin. Deveyî pêvajoyê jî divê mafê hêviyê were sepandin. 27’ê Sibatê, beriya wê, piştî wê û banga 9’ê Tîrmehê bi awayekî eşkere nîşan didin ku pêvajo ji aliyê Birêz Abdullah Ocalan û gelê Kurd ve bi cidî û jidil tê birêvebirin. Ji bo serkeftina pêvajoyê divê pêngav ne yekalî bin, ji aliyê her du aliyan ve û bi lez werin avêtin.’’
