Birayê Rêberê Gelê Kurd Abdullah Ocalan, Mehmet Ocalan ku pê re hevdîtin kir, hişyariyek krîtîk da. Mehmet Ocalan têkildarî hevdîtina ku li Girtîgeha Ewlekariya Bilind a Tîpa F a Îmraliyê hatî kirin ji ANF’ê re axivî û ev hişyarî da: “Ji aliyê fîzîkî ve bêhal û extiyarbûyî xuya dikir. Di bin şert û mercên tecrîdê û vî cihê ku rêjeya wê ya nemê lê zêde ye de girtina wî, xeteriyek jiyanî ye.”
‘JI ÇAVÊ XWE EMELIYATA KATARAKT BIBÛ’
Mehmet Ocalan ragihand ku 21’ê Adarê bi kurê xwişka xwe Fatma Ocalan, Alî Ocalan û parêzerên Buroya Hiqûqê ya Sedsalê re çû Îmraliyê û diyar kir ku bi birayê xwe re nêzî saetekê hevdîtin kirine û bi parêzeran re jî saetek hevdîtin kiriye. Ocalan diyar kir ku birayê wî Rêberê Gelê Kurd Abdullah Ocalan ji çavê xwe emeliyat bûye û got, “Di çavên Serok de ev demek dirêj pirsgirêk heye. Di nava malbata me de genetîk e. Got, car din ji çavê xwe emeliyata katarakt bûye.”
‘ÇAND Û ZIMANÊ KURDÎ NIRXAND’
Ocalan destnîşan kir ku di hevdîtinê de sernavên sereke jî nirxandine û wiha got, “Newroza me û cejna me pîroz kir. Peyama xwe ya Newrozê ragihand. Em têkildarî pêvajoyê axivîn. Diyar kir ku di nava çend hefteyan de dibe hin pêşketin çêbibin. Destnîşan kir ku ji bo aştiyê tevkariyên wan didomin, 24 saet ji bo vê dixebitin. Lê belê destnîşan kir ku ev pêvajo yekalî jî pêşde naçe. Got, li çar parçeyên Kurdistanê ji bo pêşketina çareseriyê çi ji destê wî were dike. Hem ji aliyê pêvajoyê ve hem jî weke giştî dîsa li ser meseleya jinê nirxandin kir. Di hevdîtinê de bi taybetî me meseleya çand û zimanê Kurdî jî nirxand. Min jê re got, em di aliyê Kurdî de di demek pir krîtîk de ne. Min got, ji sedî 80’ê Kurdan ziman û çanda xwe winda kirine. Wî jî bi bîr xist ku ji bo çand û zimanê Kurdî tune nebe, ew 50 sal in têdikoşin û têkoşînê didomînin. Got, zimanê Kurdî divê bi qanûnan were parastin. Diyar kir ku divê perwerdeya bi zimanê dayikê hebe. Ev gotina min maye di hişê wî de ku piştre bi parêzerên xwe re jî ev mijar axivî ye. Têkildarî parastina nirxên çandî û yên Kurdî, taybet nirxandin kirin.”
‘DIVÊ DEMILDEST SEROK JI ÎMRALIYÊ WERE DERXISTIN’
Mehmet Ocalan diyar kir ku li Îmraliyê di şert û mercên tecrîda li hemberî birayê wî Rêberê Gelê Kurd Abdullah Ocalan de ti guhertin çênebûne û anî ziman ku ev rewş tenduristiya wî jî bandor dike. Ocalan şert û mercên giran ên girtina birayê wî, wisa bilêv kir: “28 salan hesin di van şert û mercan de be wê birize.”
Ocalan ev hişyarî da: “Weke kesekî ku 28 sal in herî zêde çûyî serdana Serok ez dikarim vê bêjim ku di vê hevdîtinê de, li ber çavê min ji aliyê fîzîkî ve extiyarbûyî xuya dikir. Lê navbera me tenê du sal hene. Moralê wî baş bû û têkildarî tenduristiya xwe, ji dervey çavê xwe tiştek din negot. Lê di vê qonaxa dawî de min dît ku zehmetî dikişand. Min dît ku ev tecrîda sîstematîk a li Îmraliyê tehdeyeke mezin li bedena wî kiriye. 77 salî ye û êdî nayê qebûlkirin ku di vê şert û mercên tecrîdê û rêjeya bilind a nemê de bê girtin. Weke malbata wî em li dijî vê yekê ne. Girtina wî ya di van şert û mercan de, êdî xeteriyek jiyanî ye. Ez ji vir dixwazim bang li dewletê bikim: Serok pira navbera gelan e, bi tena serê xwe di nava şert û mercên giran de hewl dide meseleyeke ku ti kes pê nikare, çareser bike. Lewma divê dewlet baldar be. Divê ev şert û mercên tecrîdê demildest bên guhertin. Ji bo tenduristiya Serok pir xeter e ku di van şert û mercan de bimîne. Gotina vê yekê di serî de wezîfeya min a mirovî ye. Dibe hin nivîskar û hwd bêjin Îmralî bi ewle ye, lê ez vekirî bêjim eger li wir bimîne xeterî li ser jiyanî wî heye. Ez vê weke kesekî ku herî zêde çûye giravê, dibêjim. Êdî 77 salî ye. Divê demildest şert û mercên fîzîkî yên Serok bên guhertin û ji Îmraliyê were derxistin.”
