Platforma çalakiyên hevbeş û tevgera jinên Bakur û Rojhilatê Sûriyeyê di 3’yê Tîrmeha 2025’an de ji bo piştgiriya jinên Siweydayê pêngava ”Bi hev re ji bo piştgiriya jinan li Siwêdayê li dijî qirkirinê” da destpêkirin.
Pêngav bi çalakiyên cûr be cûr 5 rojan berdewam kir, piştî wê di 5’ê Tebaxa 2025’an de bi lidarxistina komxebatekê hate bi dawî kirin.
Li komxebatê Cîgira Hevseroka MSD’ê Canda Mihemed li ser rewşa jin û dûrxistina wê ji cihê biryarê ji ANF’ê re axivî û wiha got, ”Em di vê komxebatê de rewşa Sûriyeyê bi giştî dinirxînin. Piştî 9 mehan ji rûxandina rejîma Baasê û hatina Hikumeta Şamê ya demkî li ser rêvebirina Sûriyeyê di van deman gelek bûyeran rûdan û bandoreke mezin li ser jinên li Sûriyeyê kir. Kongreya ku hikumeta veguhêz kongreya ji bo diyaloga niştîmanî li dar xist, di hemû aliyan de weke siyasî û civakî jin ji wê kongreyê hate dûrxistin. Her wiha di ragihandina destûra Sûriyeyê ya nû de jî di bendên ku hatine ragihandin de mafê jin tê de cih negirt. Komîteyek hate erkdarkirin û destûr hate nivîsandin, daxwazên gelên Sûriyeyê weke destûreke demokratîk nehate nivîsandin û heta niha jin di biryardana mafên xwe de cih negirtine”
Di berdewamiya axaftina xwe de Canda diyar kir ku kiriyar û êrîşên ku îro li Sûriyeyê dibin, bandora xwe li ser jinan dikin û axaftina xwe wiha domand: “Li kêleka van tiştên me anîne ziman, jin rastî tundî û êşkenceyê tê. Ji bûyer û kiryarên li Berava Sûriyeyê û heta bi komkujiyên li Siweydayê jin rastî kiriyar, qetilkirin û revandinê hatin û hîn berdewam dikin. Jinên li Sûriyeyê ev 14 salin li ber xwe dide û roleke wê sereke di rûxandina rejîma Baasê de hebû. Lê îro hemû gavên ku ji aliyê Hikumeta Veguhêz a Şamê ve tên avêtin, tê de tunekirina jinê bi awayekî xurt tê kirin û li aliyeke din jin rastî êrîş û kiryaran tê.”
Cîgira Hevseroka MSD’ê Canda Mihemed di dawiya axaftina xwe de li ser pêngav û komxebata ji bo piştgiriya jinên Siweydayê axivî û got, “Di vê komxebatê de me xwest em piştgiriyê bidin jinên Siweydayê. Ji ber jin li Siwêdayê çiqas rastî kiryaran hatin jî sekn û îradeyeke wan xurt hebû ku heta niha jî li ser lingê xwe mane û parastina ax û îradeya xwe kirin. Lê di roja me ya îro de tiştê ji me tê xwestin ew e ku em yekîtiya jin ava bikin da ku hemû hêz û rêxstinên jinan û kesayetên jin ên bi bandor bikaribin bi hev re kar û xebata xwe bidin meşandin. Îro kar û xebatek tê kirin, lê pêwîste ku bi hev re were kirin da ku hemû jinên Sûriyeyê bikaribin bi yek helwest û bi awayekî wekhev bibin û hemû pirsirêkên jinan çareser bikin. Her wiha divê bi hev re kiryarên ku hatine kirin şermezar bikin û daxwaza cezakirina kesên bi van kiryaran rabûne were kirin. Di heman demê de li ser mafên xwe yên rawa nîqaş bike, daxwaza wê bike û di biryardayînê de cihê xwe bigire.”
