Parlamenterê DEM Partiyê Alî Bozan anî ziman ku biryara binpêkirinê ya dawî ya ku Dadgeha Mafên Mirovan a Ewropayê (DMME) têkildarî Selahattîn Demîrtaş da, ne tenê serlêdaneke şexsî her wiha bal kişand ser asta diyarker a krîtîk a atmosfera siyasî ya li Tirkiyeyê.
Bozan diyar kir ku çarçoveya biryara DMME’yê ne tenê li ser rewşa girtîhiştina Demîrtaş e, di heman demê de li ser pêvajoya Doza Kûmpasê ya Kobanê û zextên siyasî yên li ser siyasetmedarên HDP’yî xwedî tespîtên balkêş e. Bozan got, “Ev yek ne tenê biryareke têklidarî binpêkirineke şexsî ye. Ev biryar li gel Demîrtaş ji bo hemû siyasetmedarên HDP’yî yên têne darizandin gelekî girîng e. Bicihanîna biryarê êdî mecbûriyeteke.”
Bozan got, “DMME ne tenê binpêkirina azadiya şexsekî her wiha qala zextên siyasî yên kolektîf jî dike. Lewma ev biryar divê ji bo hemû dozên ku siyasetmedarên HDP’yî lê têne darizandin yekser derbasdar be. Eger ev biryar ji nedîtî ve bê ji aliyê hiqûqî û siyasî ve wê bibe sedema windabûna baweriyê ku telafiya wê zehmet e.”
Bozan rexne li Plana Çalakiyê ya Tirkiyeyê kir ku tê de ragihand ku di mijara ‘mafê hêviyê’ de wê guhertinan neke û diyar kir ku DMME’yê di biryarên xwe yên derbasbûyî de bal kişand ser vê rewşê û bang li Tirkiyeyê kir ku di vê mijarê de sererastkirinên qanûnî bike.
Bozan got, “Di çarçoveya nîqaşên pêvajoya çareseriyê ya nû de, mafê hêviyê gelekî krîtîk e. Di vê mijarê de îradeya siyasî ya Tirkiyeyê tê ceribandin.”
Bozan ragihand ku meclîs bêyî bikeve betlaneyê divê guhertinên qanûnî li ser mafê hêviyê bike û got, “Nabe ku ev mesele bê taloqkirin. Eger wê ruhê dema nû cidî bê dîtin, meclîs bêyî dereng bikeve divê bixebite. Hem Doza Kûmpasê ya Kobanê hem jî mafê hêviyê ne tenê hiqûqî her wiha ji bo aştiya civakî jî testek e.”
Alî Bozan anî ziman ku weke DEM Partî ji bo avakirina pêvajoya nû ew li çar aliyên Tirkiyeyê civînên gel lidar dixin û destnîşan kir ku di van civînan de yek ji mijarên ku herî zêde gel tîne ziman ew e ku desthilatdarî gavê neavêje. Alî Bozan got, “Civak dixwaze baweriya xwe bi dema nû bîne, lê belê ji bo vê baweriyê jî divê edalet bi cih bê anîn.”
