Parlamenterê Colemêrgê yê DEM Partiyê Onûr Duşunmez li ser desteserkirina şaredariyan ji ANF’ê re axivî û got, “Ev cezayê bêhiqûqî wê careke din ji Dadgeha Bilind vegere. Di dosyayê de biryareke binpêkirinê ya Dadgeha Mafên Mirovan a Ewropayê (DMME) heye. Ev dosyaya ku darizandin lê tê kirin, li dijî hiqûqê ye, lê li gel vê yekê jî di çarçoveya vê darizandinê de qeyûm hate tayînkirin. Me zanîbû ku cezayê hatiye birîn hiqûqî nîne, biryareke siyasî ye, ji bo tayînkirina qeyûm hincetek hatiye afirandin. Bi tayînkirina qeyûm re ev yek fermî kirin.”
JI WAN HEYE KU WÊ HESAB NEYÊ PIRSÎN
Onûr Duşunmez ragihand ku bi destê hêzên paramîlîter li ser şaredariyê êrîş hatiye destpêkirin û got, “Êrîş çar roj in li dijî ciwan, jin û dayikên me tê kirin ku li ber şaredariyê dixwazin hurmet ji îradeya wan re bê nîşandan û nerazîbûna xwe ya demokratîk nîşan didin. Êrîş li hemberî wan hate kirin. Piştî ku girseya gel kete hundirê şaredariyê bi fîşekên plastîk û bombeyên gazê êrîş li girseya gel hate kirin. Li gel bangên me jî bersiveke erênî nehate dayin. Me ji bo danûstandinan hewl dan, lê belê nekarîn encamekê bi dest bixin. Piştî ku hêzên ewlekariyê ketin hundirê şaredariyê, li parlamenter, hevşaredar û ciwanên me xistin. Êşkence kirin, zilm kirin. Yên ku vê zilmê dikin ji wan heye ku wê li pêşberî hiqûqê hesab ji wan neyê pirsîn. Bi rengekî bêperwa tevdigerin lê belê bila zanibin ku em ji kevneşopiya gelekî berxwedêr tên. Weke nûnerên gelê Kurd ê ku bi salan e ji bo rûmeta xwe li ber xwe dide, em li wê derê bûn. Em ê berxwedana xwe li her qadê dewam bikin.”
DI KEVNEŞOPIYA ME DE PAŞVEGAVAVÊTIN NÎNE
Duşunmez destnîşan kir ku têkoşîna wan a li hemberî zîhniyeta qeyûm wê dewam bike û got, “Yên ku hewl didin me bi qeyûman û êşkenceyê bitepisînin bila li kevneşopiya me ya têkoşînê binihêrin. Xelkê Wanê bi serbilindî li ser piyan e. Em ê hemû rêyên hiqûqî bi kar bînin. Ji bo xwedîderketina li îradeya xwe em ê nerazîbûna xwe ya demokratîk nîşan bidin. Kes nikare îradeya me teslîm bigire. Di kevneşopiya me ya têkoşînê de paşvegavavêtin nîne. Hevrêyên me li hemû qadan li ber xwe didin. Em ê vê berxwedanê mezin bikin û nerazîbûna xwe ya demokratîk bi rêxistin bikin. Çawa ku sê serdem in me qeyûm şandin Enqereyê, em ê bi xwedîderketina li îradeya gel careke din qeyûman bişînin cihê jê hatine, bişînin Enqereyê.”
