Wezareta Xezîneyê ya DYE cezayên aborî li 7 fermandarên komên Heşdî Şebî birî. Wezaretê, ragihand ku ev kes berpirsên plankirin û pêkanîna êrîşan li dijî berjewendiyên DYE ne.
Ofîsa Kontrolkirina Mal û Milkên Biyanî (OFAC), bi daxuyaniyekê diyar kir ku fermandarên ceza li wan hatiye birîn girêdayî komên Hizbullah, Tevgera Nuceba, Esayîb Ehil El Heq û Tabûra Seyîd El Şuheda ne û wekî komên herî tundraw bi nav kir.
Di daxuyaniyê de hate diyarkirin ku komên navborî li gorî biryara 13224’an wekî “terorîstên cîhanê” hatine destnîşankirin.
Wezareta Karên Derve ya DYE, daxuyand ku helwesta wê ya piştgiriya Iraqeke aram, pêşketî û xwedî serdestî sabit e.
Her wiha ji hikûmeta Iraqê xwest ku gavên cîd biavêje da ku xaka Iraqê nebe bingeha çalakiyên têkbirina istiqrara herêmê, komên çekdar ên ser bi aliyên herêmî ve tune bike û nûnertî û kesên biyanî li ser xaka xwe biparêze.
