DYE li dijî du tankerên petrolê yên girêdayî Venezuelayê û di lîsteya danekirinê de ne li pey hev operasyon pêk anîn. Rayedarên DYE’yê ragihandin ku tankerên Bella 1 û Sophia di operasyonên li Bakurê Atlantîk û Karayîbê de ketine bin kontrola hêzên DYE’yê.
Fermandariya Ewropayê ya DYE’yê (U.S. European Command) ragihand ku keştiya bazirganî Bella 1 bi hinceta “binpêkirina danekirinê yê DYE’yê” hatiye desteserkirin. Di daxuyaniya ku li ser medyaya dîjîtal hat parvekirin de hat diyarkirin ku tanker hewl dan dorpêça DYE’yê ya ku armanc dike pêşî li şandina petrolê ji bo Venezuelayê bigire derbas bikin.
LI BAKURÊ ATLANTÎKÊ û KARAYÎBÊ OPERASYONÊN HEMWEXT
Wezîra Ewlekariya Navxweyî ya DYE’yê Krîstî Noem ragihand ku Li Karayîbê tankerek din a bi navê Sophia ji hêla hêzên DYE’yê hatiye desteserkirin. Noem anî ziman ku her du keştî herî dawî li bendergeha Venezuelayê sekinîne yan jî ber bi welêt ve diçûn.
Rayedarek DYE’yê ji Associated Press re axivî û diyar kir ku tankera Bella 1 di operasyoneke leşkerî de hatiye desteserkirin û radestî hêzên ewlehiyê hatiye kirin. Rayedar ji ber hesasiyeta operasyonan nexwest navê wî were eşkerekirin.
GIRÊDANA HIZBULLAHÊ Û HÛRGILIYA RÛSYAYÊ
Tankera Bella 1 a ku li ser navê şîrketek ku bi Hizbullaha Lubnanê ku ji hêla Îranê ve tê piştgirîkirin qeydkiriye bi hinceta ku qaçaxvaniya petrolê dike di sala 2024’an de ji hêla DYE’yê ve li lîsteya danekirinê hatibê zêdekirin. Ewlekariya Peravê ya DYE’yê di meha Kanûnê de hewl da ku li Karayîban siwarî keştiyê bibe, lê xebatkarên keştiyê destûr nedabûn û ber bi Okyanûsa Atlantîkê ve bi rê ketibû.
Di vê pêvajoyê de ala Rûsyayê li keştiyê hat daliqadin û navê Marînera lê kirin û heta derket holê ku ala Rûsyayê li ser keştiyê hatibû xêzkirin. Li gorî pergala şopandina deryayî yên çavkaniya vekirî, keştî berî ku were desteserkirin di navbera Skoçyaû Îzlandayê de bû.
RÛSYA BERTEK NÎŞAN DA
Wezareta Derve ya Rûsyayê di daxuyaniya beriya desteserkirinê de ragihand ku “ew ji rewşa neasayî ya li dora tankera petrolê ya Rûsî Marinera bi fikar dişopînin”. Di daxuyaniyê de hat diyarkirin ku keştî tevî ku bi qasî 4,000 kîlometreyan dûrî peravên DYE’yê ye jî bi rojan ji hêla Ewlekariya Peravên DYE’yê ve dihat şopandin.
Fermandariya Ewropayê ya DYE’yê ragihand ku operasyon li gorî fermana lêgerîn û desteserkirinê ya ku ji hêla dadgeha federal a DYEY’yê ve hatiye dayîn, hatiye kirin.
RÊVEBERIYA TRUMP PEYAMA TUND DA
Rayedarên leşkerî yên DYE’yê diyar kirin ku operasyon li gorî belevoka serokatiyê ya ku ji hêla Serokê DYE’yê Donald Trump ve li dijî “keştiyên ku danekirin binpê dikin û ewlehiya nîvkureya rojava tehdît dikin” hatiye kirin.
Desteserkirina tankeran yekser piştî hêzên DYE’yê li paytexta Venezuela Caracasê, Serok Nicolás Maduro û hevjîna wî binçavkirin, pêk hat.
Wezîrê Derve yê DYE’yê Marco Rubio di daxuyaniya NBC de got, “Em qanûna DYE’yê ya derbarê danekirinên petrolê de bi cih tînin. Em biryarê ji dadgehê digirin û van keştiyan desteser dikin. Ev pêkanîn wê berdewam bikin.”
Rayedarê DYE’yê diyar kirin ku operasyonên bi vî rengî li dijî binpêkirinên danekirinên têkildarî Venezuelayê wê berdewam bikin.
