Fermandariya Başûr a artêşa DYE’yê (SouthCom) li ser hesaba xwe ya medyaya dîjîtal daxuyanî da û ragihand ku piştî ewlehiya keştiya sereke hate girtin û ji muretebatê derket bejahiyê, keştî bi keştiyên piştgiriyê yên giradayî xwe ve noqî avê bû. SouthCom îdîa kir ku keştiya 5’ê Îlonê roja şemiyê hate îmhakirin, ‘ji bo piştgirî dayîna rêxistina narko-teror a alîgirê şîrketa Los Choneros fealiyet dimeşîne’.
Hêzên Deryayî yên Ekvadorê ragihand ku 26 muretebatên keştiya bi navê Maria-Candelaria teslîm girt û muretebat biribû Lîmana Manta ya li başûrêrojavayê welêt.
Li Lîmana Mantayê di rojên dawî de muretebata du keştiyên din ên ji aliyê DYE’yê ve hatin noqavkirin, roja îniyê biribûn navenda polîsan. Muretebat roja şemiyê ji aliyê dadger ve bêyî ku sûcdariyek lê were kirin, hate berdan.
MASÎVAN: MASÎVANTÎ DIBE SÛC!
Operasyonên DYE’yê bû sedema nerazîbûna sektora masîvantiyê ya li Ekvadorê jî. Ji nûnerên sektora masîvantiyê ya li Mantayê Cesar Delgado daxuyanî da AFP’ê û got, “Karê masîvantiyê dikin sûc. Ji bo Hêzên Deryayî yên DYE’yê her masîvanê diçe masîvantiyê, dibe sûcdarekî potansiyel.”
Di rojên dawî de Hêzên Deryayî yên DYE’yê bi giştî 4 keştiyên Ekvadorê bi îdîaya têkiliya wan bi qeçaxçitiya tiryakê heye, îmha kir. Temamiya muretebata li keştiyan têkiliya xwe ya bi tiryakê re red kirin.
Rêxistina Çavdêriya Mafên Mirovan (Human Rights Watch) jî ragihandibû ku meha Tîrmehê hêzên DYE’yê li peravê Ekvadorê êrîş bir ser 3 keştiyan û ji ber êrîşan herî kêm 8 kes winda bûn. Rêveberiya Washington vê îdîayê red dike.
