Parlamenterê berê yê Kurdistanê û endamê Kongreya Neteweyî ya Kurdistanê (KNK) Ebûbekir Helednî di hevpeyvînek taybet de bi rêya Ajansa Nûçeyan a Firat (ANF) re bal kişand ser girîngiya berxwedana li Rojavayê Kurdistanê û ew wekî sedemek sereke ji bo yekîtiya gelê Kurd nirxand.
Helednî tekez kir ku berxwedana gel kariye “ferzkirina plana paqijkirina etnîkî li ser gelê Kurd” têk bibe û li çar beşên Kurdistanê û di nav Kurdên li derveyî welêt de hevgirtinek neteweyî biafirîne, ku ew jî pozîsyona Kurdan xurttir kiriye.
‘YEKBÛNA KURDAN ERKA NETEWEYÎ BÛ JI BO REDKIRINA ZILMÊ’
Ebûbekr Helednî di destpêka axaftina xwe da behsa girîngiya rola berxwedana li Rojavayê Kurdistanê ji bo yekîtiya gelê Kurd kir û got: “Divê em spasiya Rojavayê Kurdistanê bikin ji bo yekkirina hemû Kurdan li her çar beşên Kurdistanê û derveyî welêt. Herwiha eşkere bû ku ev pêştevaniya netewî, moral dayîna herî bi hêz bû ji bo xwîşk û birayên me li rojavayê Kurdistanê. Ev kar erkekî netewî, nîştimanî, mirovî û red kirina zordariye ye.”
‘ÊRÎŞÊN LI SER ROJAVA HEWLDANEK JI BO QIRKIRINA KURDAN BÛ’
Helednî îşaret bi êrîşên dijî Rojavayê Kurdistanê û dorpêça Kobanê ku zedetirî yek mehê berdewame kir û got: “Tiştê ku li Rojava diqewime ‘kampanyayek paqijkirina etnîkî û qirkirinê’ ye ku nasnameya gelê Kurd dixe bin polîtîkayek tunekirin û qirkirinê. Berxwedana şervanan û piştgiriya neteweyî bi bandor bû, di encamê ew bandor jî biryar û planên hêzên hegemonik guherî û dilsozî bi Kurdan re di asta navnetewî hat afrandin.”
‘STATUYA KURDAN DI RAGEŞIYÊN SİYASÎ DE XURT BÛ’
Helednî got ku vê carê gel bi xwe bûye xwediyê doza xwe ya neteweyî û bi taybetî li bajar û paytextên cîhanê û Ewropayê derketine qadan û bilêv kir ku ev yek bûye sedem ku statuya Kurdan di rageşiyên siyasî yên pêşeroja Rojhilatê Navîn û heremê de xurt bibe.
‘HEMÛ KURD PIŞTGIRIYÊ DIDIN ROJAVA’
Helednî tekez kir ku divê Rojava bi tenê neyê hiştin û têkoşîn divê li her çar beşê Kurdistanê û derveyî welêt berdewam bike. Helednî peyamek ji bo Rojava şand û got: “Kurdên li her çar beşên Kurdistanê û derveyî welêt piştgiriyê didin we. Hûn di vê berxwedan û şer de ne bi tenê ne û tevahiya gelê Kurd piştgiriyê dide we. Di seranserê dîrokê de, hemû zordar û dagirkerên Kurdistanê têkçûne, lê gelê Kurd maye û berdewamî li ber xwe dide.”
‘DIVÊ PARTIYÊN KURD JI BO HER PÊŞKETIN Û GUHARTINEKÊ AMADE BIN’
Ebûbekîr Haldnî di dawî a gotinên xwe desthilatdariya siyasî ya Başûrê Kurdistanê rexne kir û got: “Nifşê niha yê Kurdan nifşek welatparêz e û gel erkê xwe bi cih aniye. Gel ji dil dixwaze pêştigiriya yekitiya kurd bike, hikumeta heremê jî pêwîste li gor wê daxwazê ji bo piştgiriya yekitiya kurdan kar bike û vesaziyên rastîn û jidil pêk bîne. Ji ber wê jî hemû partiyên siyasî yên başûr, hem desthilatdar û hem jî opozîsyon pêwîst e jûrek e operasyonên hevbeş çêbikin da ku bikarin bi hemû pêşketinên ku gefê li gelê me dixwin re bitêkoşin.”
