Endama Koordînasyona Kongra Star Jiyan Hisên li ser destketiyên şoreşa jinê û girîngiya wê ji ANF’ê re axivî.
Jiyan Hisên di destpêka axaftina xwe de diyar kir ku jinan bi têkoşîneke mezin destketî bi dest xistin û got, “Dema ku mirov qala Şoreşa Rojava bike, karekî bê navber ê 14 salan ê bi pêşengiya jinan heye. Di encama vê têkoşînê de gelek destketî hatin bidestxistin. Ev destketî li ser pîvanên bingehîn hatin avakirin; ji van a destpêkê jî azadiya jinê ye. Mebest ji azadiya jinê hebûna jinê li qadên fikrî û zanistî û xurtbûna rola wê ya li nava civakê ye. Ji ber vê yekê jî pîvanên bingehîn ên demokrasî û azadiyê hebûna jinan li nava hemû saziyan, li qadên siyasî û civakî ye.
Me dît bê YPJ çawa ava bû; ev hêz hem li Rojava hem jî li derveyî Rojava ji bo jinan bû çavkaniya sûdwergirtinê. Eger îro jinek dikare rahêje çekê û şer bike, eger li hemberî hêzeke bi vî rengî ya tarî dikare ewqas destketiyan bi dest bixe, wê demê li her qada jiyanê dikare rola xwe bilîze. Ji ber ku gelê Kurd xwedî hişmendiya demokrasî û azadiyê ye, yên ku pêşengÎ ji şoreşê re kirin jinên Kurd e. Piştre jinên ji gelên din ên li Rojava xwestin tevlî şoreşê bibin, bibin xwedî destketî û van destketiyan bi hev re biparêzin. Ev destketî bi berdêl û lehengiya jinan hatin bidestxistin. Azadiya jinê çiqasî bi pêş ve biçe û hebûna jinê çiqasî garantî bibe, êrişên li dijî jinan jî ewqasî zêde dibe. Ji ber ku nayê xwestin ku jin bibin xwedî hebûn û statuyê.”
‘BERPIRSYARIYA ME YE KU EM DESTKETIYÊN XWE BIPARÊZIN’
Jiyan Hisên destnîşan kir ku jin ji bo karibin hebûna xwe garantî bikin divê têkoşîna xwe hîn bilind bikin û axaftina xwe bi vî rengî dewam kir: “Ji bo jin li hemberî van êrişan zane bin divê asta xwe ya têkoşînê û hişmendiyê bilind bikin. Ev hişmendî divê ne tenê şexsî be, divê ji bo jinan hemûyan esas bê wergirtin û yekîtiya jinan hîn bêhtir divê bê xurtkirin. Îro dema ku mirov bala xwe didin parçeyên din ên Kurdistanê û cîhanê ji bo jinan gelek destketî hene; divê em li vê qadê têkoşîna xwe mezin bikin. Di vê pêvajoyê de hebûna jinê nayê qebûlkirin. Ji bo ev hebûn ji aliyê siyasî, hiqûqî û destûra bingehînî ve bê garantîkirin têkoşîn tê meşandin. Di heman demê de pêwîste jin hevgirtina xwe xurt bike Li Rojava gelek destketiyên me hene. Hêza bingehîn a ku em weke xeta sor dibînin û ti carî dest jê bernadin YPJ ye. Ji ber ku yên hebûn û xaka me diparêzin, heta roja îro bênavber li qadên şer têkoşiyan û li ber xwe dan ew in. Di oxira vê rastiyê de bi hezaran jin şehîd bûn.
Bi heman rengî sîstema me ya hevserokatiyê divê li her deverê bê belavkirin. Ji ber ku dema jin tevlî mekanîzmayên biryardanê bûn, hingî li her derê wekhevî dikare bê avakirin; ji ber vê jî divê ev sîstem bê garantîkirin. Ji bo xweparastinê, ji bo perwerde, ziman û hebûna me divê em têkoşîna xwe dewam bikin. Zanistiya Jineolojiyê ku Rêber Apo sala 2008’an pêşkêşî me kir û li Rojava weke zanista bingehîn hate qebûlkirin, me digihîne dîrok û paşeroja me. Hikumeta heyî ya li Sûriyeyê hebûna jinan qebûl nake. Ji ber ku di sîstema wan a hikumetê de cih ji jinan re nayê dayin. Halbûkî dema ku em bi wan re nîqaş dikin, em dibêjin ku divê li her qadê cihê jinê hebe. Li vê derê têkoşîneke jinê ya 14 salan heye; dema ku di hişmendiyê de guhertin hate kirin hingî em dikarin destketiyên xwe biparêzin. Lewma wezîfe û berpirsyariya me ye ku destketiyên xwe biparêzin û li hemberî vê hikumeta demkî hebûna xwe garantî bikin.”
