Serokê rûhanî yê Civaka Misilmanên Miwehidîn a Durziyan Şêx Hikmet El Hicrî di axaftineke li ser televîzyonekê de, anî ziman ku daxwazên Durziyan nayên nîqaşkirin û got: “Meşa ber bi pêkanîna mafê diyarkirina çarenûsê ve bi gavên sabît dewam dike. Ev yek dûrî serdestiya komên ku negengaziya jiyana bi wan re îspat kiriye, pêk tê. Ji bilî kesên ku ji hêla gelê wî ve hatine hilbijartin, tu serokatî yan desthilatdarî li ser vî çiyayî tune ne.”
El Hicrî, di serî de hikûmet û gelê Îsraîlê, spasiya welat û rêxistinên ku piştgiriyê didin xweseriya Durziyan, kir.
El Hicrî, her wiha destnîşan kir dê mafên xwe bistînin û baştir dikarin kar û barên herêma xwe bi rê ve bibin û got: “Hêzên desthilatdar wê nekarin bi darê zorê û xapandinê biryarên xwe ferz bikin. Hewldanên wê êdî eşkera bûne.”
Hikmet El Hicrî, hikûmeta demkî weke “hikûmeta terorê” bi nav kir û xwest hikûmet ji ber tevahî sûc û binpêkirinên ku pêk anîne li gorî qanûnên navneteweyî were darizandin.
El Hicrî got: “Divê êrîşkar werin neçarkirin ku çareseriya navneteweyî ya agirbesta Tîrmeha 2025’an pêk bînin, dîlgirtiyan vegerînin û rewşa kesên bi darê zorê winda ne, were eşkerakirin û gund û bajarokên Durziyan werin rizgarkirin.”
El Hicrî, bal kişand ser dorpêça aborî û siyasetên birçîkirinê û got gelê Cebelê (Çiya) bi zanebûn û hevgirtinê van zextan derbas dike.
