Banga dîrokî ya Rêber Apo hîna jî hem li Tirkiye hem jî li raya giştî ya navneteweyî tê nîqaşkirin. Her kes daxuyaniyê û tiştên ji vir û şûnde biqewimin, nîqaş dikin. Her kes daxuyaniyên dewletê û PKK’ê mereq dike.
Piraniya nîqaşan li ser banga dîrokî ye û têkildarî naveroka metna bangê jî, analîz tên kirin. Nivîskar Îhsan Elîaçik banga Rêber Apo û helwesta raya giştî ya Tirkiyeyê ji ANF’ê re nirxand.
Elîaçik diyar kir ku ew banga Rêber Apo weke paşveçûnekê nabîne û got, “Banga Ocalan ne paşveçûnê, pêngaveke îdeolojîk îfade dike. Sîstemeke li ser esasê bawerî, nîjad, mezheb û kes naxwaze; li ser esasê îradeya civakî ya demokratîk dixwaze. Difikire ku li cihekî wiha Kurd jî wê bikarin xwe îfade bikin.”
Elîaçik wiha dewam kir: “Yên xwedî refleksên ‘netewperest’, dikevin vê fikrê, ‘wê çi ji şehîdên me were, em nikarin xiyanetê li wan bikin’. Dewleta heyî encex bi zexteke derve, dikare tevbigere. Netewperest jî heta adapteyî pêvajoyê dibin, wê têra xwe dem bixwe. Ocalan geşedanên hundir û derve dişopîne; ew jî li ser esasê paradîgmaya xwe dinirxîne. Li rêyan digere ku ev pêvajo bi sûd be.”
Elîaçik ragihand ku netewperestên Tirk hîna ji pêvajoyê re ne amade ne û got, “Ji ber ku demokrasiya radîkal, wê di dewletê de dawî li desthilatdariya Tirk bîne, lê li şûna wê jî destûrê nade desthilatdariya Kurd. Ji dervey îradeya civaka demokratîk, desthilatdariya ti kesê pêş nabîne, hemûyan wekhev dike.”
