Di 30’ê mijdarê de li hola Meclîsa Xweseriya Demokratîk a Şengalê (MXDŞ) ya li Deriyê Geliyê Kersê 2. Konferansa Şaredariyên Gel ên Şengalê bi tevlîbûna 350 delegeyan û bi dirûşma, ‘‘Em ê bi şaredariyên gel ava xwe, axa xwe û jiyana xwe komînal bikin” hate lidarxistin. Ji Şaredariya Wargeha Ş. Rûstem Cûdî ya Mexmûrê û şaredariya Binarê Qendîlê jî tevlîbûn ji konferansê re çêbû. Konferans bi perspektîfa destpêkirina hemleya avakirina komûnan bi dawî bû.
Delegeyên ji civaka Êzidî û Erebên Şengalê yên tevlî konferansê bûn, ji ajansa me re axivîn û kêfxweşiya xwe ya ji encamên konferansê anîn ziman.
Hevserokê Şaredariya Gel a Serdeşta Çiyayê Şengalê Ziyad Qewal diyar kir, dema şaredarî di sala 2015’an de (salek piştî fermanê) hate avakirin, weke yekeyeke biçûk bû û wiha axivî: ‘‘Xebatên şaredariyê yên xizmetê destpêkê bi komeke biçûk destpêkir. Tevî bê derfetiyan û hejmareke kêm jî, xizmetê ji civaka Êzidî re kirin. Lê ji wê rojê heya niha her diçe şaredarî zêde dibin. Şaredariyê ji nava wan bê derfetiyan gihandine roja îro. Konferansa me jî serkeftî bi encam dibe. Îro 14 belediye li Şengalê avabûne. Bi heman rêbaz û mirovan me şaredarî ji komeke biçûk gihand vê astê. Çawa gelê me ji dema fermanê heya niha piştgiriya me kiriye û me bihevre şaredariyê gihandiye vê astê, em dixwazin gelê me piştgiriya xwe ji ya berê jî zêdetir ji bo şaredariyên xwe bike. Şaredarî wê bi avakirina komînan xebatên xwe mezin bike.’’
‘WÊ BI AVAKIRINA KOMUNAN KES BÊKAR NEMÎNE’
Mamoste Cîlan Silêman jî balkêşa ser nîqaşên li konferansê hatine kirin û got: ‘‘Gelek nîqaş di konferansê de hatin meşandin û gelek biryarên baş jî hatin girtin. Hemû biryarên hatin girtin, derbarê civakê de û parastina wê de bû. Pirsgirêka avê û keskahiyê li Şengalê heye. Ji bo çêkirina pergala avê biryar hatin girtin. Dîsa zêdekirina rêjeya keskahiyê û paqijî jî mijarên girîng ên nîqaşêbûn. Meclîs wê komûnan ava bikin. Wê bi avakirina komûnan mirovek jî bêkar nemîne.’’
Hevserokê Şaredariya Gel a gundê Bîrcarî (Ereb) Bedîx Hemet jî behsa girîngiya konferansê kir û dazanîn ev konferans ji bo gelên Şengalê xwedî girîngiyeke mezin e.
