Endamê Şandeya Îmraliyê û Serokwekîlê Meclîsê Sirri Sureyya Onder piştî şeva Sêşemê krîza dil derbas kir, rakirin Nexweşxaneya Florence Nightingale ya li Şîşliyê.
Berdevka Partiya Wekhevî û Demokrasiyê ya Gelan (DEM Partî) Ayşegul Dogan li ber nexweşxaneyê daxuyanî da û got, “Heya niha ji dervey daxuyaniyên ku bijîjkan bi we re parve kirine, agahiyek nû tune ye. Hîna emeliyat ne qediya ye.”
Ayşegul Dogan anî ziman ku piştî emeliyat qediya, ew li bendê ne ku Onder rakin beşa lezgîn a nexweşxaneyê û ev tişt jî got: “Piştî rakirin beşa lezgîn, em ê têkildarî emeliyatê agahiyan bi we re parve bikin.”
Ayşegol Dogan wiha dewam kir: “Birêz Sirri Sureyya mirovê demên pir zehmet e. Dilê wî gelek demên zehmet derbas kirine, bûyerên pir giran jiyan kirine, dîtine; di demên zehmet de berpirsyariyên mezin girtine ser xwe. Lewma em bawer dikin ku ew ê bi serketî ji vê emeliyata zehmet, derkeve. Hêvî û baweriya me di vî alî de ye. Bi dawî nebûna emeliyatê, nayê wê wateyê ku baş derbas nabe. Jixwe dihat payîn ku wê emeliyat hinekî demdirêj bibe. Bijîjkan jî got, ew rû bi rûyê nexweşiyeke zehmet in. Lê belê zehmetbûna wê, nayê wê wateyê ku wê bi ser nekeve. Lewma em bi hêviyeke mezin li bendê ne. Ji bo vê piştevaniyê, em spasiya gelên Tirkiyeyê hemûyan dikin. Her tişt weke dihat pêşdîtin, diqewime. Bijîjk wê daxuyaniyên pêwîst bidin. Em ê jî wê carna pirsên tên mereqkirin, bigirin.”
