Hikûmeta DYE’yê, ragihand ku ew ê rapora xwe ya salane ya hejmartina bêewlehiya xwarinê li welêt rawestîne. Wezareta Çandiniyê (USDA), diyar kir ku rapor “pir siyasî” ye û ji bo siyaseta giştî bêfeyde ye. Rapora 2024’an dê di 22’yê Cotmeha 2025’an de were weşandin û dê rapora dawî be.
Li gorî daneyên sala 2023’yan, ji sedî 13.5’ê ji malbatên li Dewletên Yekbûyî yên Emerîkayê bi rengekî birêkûpêk nekarîne xwe bigihînin xwarina têr û bi tendurist. Ev rêjeya herî bilind ji sala 2014’an vir ve ye.
USDA’yê rêbazên anketê “subjektîf” û “şaş” bi nav kir. Lê di heman demê de rêveberiya Trump îdîa dike ku xizanî kêm bûye û kar zêde bûye li welêt.
Li gorî nûçeya Reutersê, pisporan diyar dikin ku biryar siyasî ye. Forbes, nivîsand ku neberhevkirina daneyan “rêyek ji bo veşartina rastiyê ne.” Profesor Colleen Heflin, jî rakirina vê hejmartinê di nav enflasyona bilind û bazara kar a xirab de “xeternak” dît.
