Civîna kabîneyê ya ku bi serokatiya Serokê Giştî yê AKP’ê û Serokomar Recep Tayyip Erdogan li Beştepeyê hatî lidarxistin, bi dawî bû. Erdoğan piştî civînê daxuyanî da û bal kişand ser Komisyona Demokrasî, Xwiş-Biratî û Hevgirtina Millî ku di çarçoveya proseya çareseriya pirsgirêka Kurd de li Meclîsê hatiye damezrandin.
Erdogan anî ziman ku hefteya borî ji bo vê armancê gaveke watedar hat avêtin û wiha dewam kir:“Ev komisyon ku bi beşdariya partiyên muxalefetê hat damezrandin, ji bo ku Meclîsa me ku cihê îradeya neteweyî ye, xwedî li vê pêvajoyê derkeve, gelekî girîng e. Em ji vê xwedîderketinê kêfxweş in. Biryarên komisyonê bi yekdengî hatin girtin, ev jî pêşveçûneke hêvîdar e. Em hêvî dikin ku ev nêzîkatiya avaker dewam bike.”
Erdogan, bal kişand ser yekîtî û hevgirtinê û got: “Ev dewlet, bi Tirk, Kurd û Ereb, dewleta her yek ji 86 milyon kesan e.”
Erdogan wiha domand: “Em hemû xwediyên bingehîn ên Komara Tirkiyeyê ne. Her çend şêwazên jiyana me, nêrînên me yên siyasî û fikrên me cuda bin jî, ev yek naguherîne. Mijareke ku li ser aramî û paşeroja 86 milyonan bandor dike , em piştgirî, tevkariyên û rexneyên her kesî girîng dibînin. Komisyon dê li gorî bendewariyên gelê me erkên xwe bi cih bîne. Em jî ji bo xebatên wê her cûre piştgiriyê didin.”
Erdogan diyar kir ku roja Înê ya borî, wezîrên Parastina Neteweyî û Karên Hundir û Serokê MÎT’ê ji komisyonê re pêşkêşiyeke berfireh kirine û got, “Em bi hev re xwînê rawestînin, êş û hêstiran kêm bikin.”
