Komên piştevaniyê didin Hikûmeta Veguhêz a Sûriyeyê duh bi şev li taxên Lazqiyeyê û kolanên Cebla û Tartûsê operasyon li dar xistin û dirûşmeyên mezhebparêziyê berz kirin. Êrîşî dikan û xaniyên welatiyan kirin. Komên li herêmê bûne sedema tirsê, wesayît perçe kirin û zirar dan mal û milkên welatiyan.
Hêzên Hikûmeta Veguhêz a Sûriyeyê, li bajarokê Enaz ê Tartûsê bi ser malên ciwanên ku beşdarî xwepêşandanê bûne de avêtin û ew binçav kirin.
Komên çekdar, Taxa Ekrem a Humsê bi dest xist û ji esnafan xwest ku ew dikanên xwe bigirin û gef li şêniyên taxê xwarin.
‘’Miftiyê Ezazê’’ yê gef li xwepêşanderên Elewî xwarin û got: ‘’Xwepêşander guleyan berdidin zarokên me.’’
Aktîvîstên girêdayî Hikûmeta Veguhêz a Sûriyeyê jî dîmenên tank, wesayîtên zirxî, obus û wesayîtên giran perve kirin û diyar kirin ku ev ber bi beravê ve diçin. Lê belê cihê dîmenan û qadên ku wesayit lê hatine bicihkirin nehatin diyarkirin.
Komeleya Elewiyên Sûriyeyê ya Ewropayê têkildarî mijarê daxuyaniyeke ku ‘’êrîşên Hikûmeta Veguhêz û komên girêdayî wê yên li ser xwepêşanderên aşitiyane’’ şermezar dike da û weke ‘’sûcekî xetere û hatiye belgekirin’’ pênase kir.
Komeleyê di daxuyaniya xwe de diyar kir ku wê her cure belge, wêne, vîdeo û şahidî ji aliyên navneteweyî yên eleqedar re werin şandin û hate xwestin ku ‘’hemû kesên ku di vîdeo û wêneyan de cih digirin, guleyan berdidin û êrîş dikin’’ werin cezakirin. Di daxuyaniyê de hişyariya ku ‘’rayedar têkariyê li vî sûcî nekin û paşguh nekin’’ hate kirin.
Li hin bajaran ji ber bicihkirina hêzên Hikûmeta Veguhêz a li herêmên kontrolê û zêdebûna dewriyeyan, îro ji saetên sibehê û pê ve li herêmên berav û hundirîn ên Sûriyeyê bêdengî heye.
