Di rojên borî de bi daxuyaniyekê nasnameya gerîlayên şehîd hate eşkerekirin. Ji bo gerîlayên ji Amedê, li parka Koşuyolu taziye hatin qebûlkirin. Di nava van 3 rojan de, kêliyên dîrokî hatin jiyîn. Dayik ji wêneyên zarokên xwe venediqetiyan, bi hezaran kesên beşdarî taziyeyê bûn jî ji têkoşîn û berxwedana malbatan moral digirtin. Gel hem xemgînî hem jî têkoşîn bi hev re jiyan dikir, taziyeyên şehîdên ku malbatên wan neamade jî bi heman rengî qebûl kir. Yek ji van jî Şervan Partîzan (Bawer Arşîmet) bû.
Şervan Partîzan sala 2015’an beşdarî nava refên gerîlayan bû û sala 2024’an li Şêlazê di şer de şehîd dibe. Her wiha kurê Hevşaredara Peyasê ya berê Fatma Arşîmet e ku sala 2023’yan hate girtin.
Şervan sala 2014’an li ser rêya xwişka xwe Berjîn çû û tevlî têkoşînê bû. Berjîn sala 2023’yan li Zapê di şer de şehîd bû. Ji ber biryara hepsê ya 6 salan Fatma Arşîmet ne agahiya şehadetê ya kurê xwe ne jî ya keça xwe bihîst û nekarî beşdarî bernameya taziyeyê jî bibe. Şûna Fatma Arşîmet jî Dayikên Aştiyê dagirt. Dayikên ku sersaxî qebûl kirin, wiha gotin, “Her tişt ji bo zarok bikarin bi azad bijîn.”
‘TI ŞEHÎDÊN ME BÊXWEDÎ NÎNIN’
Dayika Aştiyê Kudret Eryilmaz diyar kir ku “Ti şehîdên Kurdistanê bêxwedî nînin” û got, “Îro ji ber ku Fatma ne ji derve ye, me cihê wê dagirt. Ne kurê wê ne jî keça wê bêxwedî nînin. Ew şehîdên hemû gelê Kurd e. Bila dilê wê rehet be. Ez jî dayika du şehîdan im, me soz daye zarokên xwe; em ê heta xwîna xwe ya dawî li pey wan û doza wan bin. Çi dibe bila bibe me sozek da, em ê li cem wan bin.”
‘GELÊ KURD DEST JI DOZA XWE NEBERDA’
Kudret Eryilmaz diyar kir ku xelkê Amedê di vê pêvajoyê de xwedî li têkoşîna xwe derket û jinûve bû yek û ev tişt got, “Ev taziye ji bo me pir giran in, lê dîsa em bi zarokên xwe serbilind in. Îro xelkê Amedê xwedî li şehîd û zarokên xwe derket. Hemû li vir bûn û malbat bi tenê nehiştin. Gelê Kurd çi dibe bila bibe, ti carî dest ji şehîdên xwe naberde û her tim li cem wan e. Îro me ev li Amedê dît. Ti kes xwe ji vê dozê dûr nabîne. Her kes di agirê dişewite de xwe dibîne.
Ez bang li dayikên Kurd dikim, divê em dest bidin destê hev û bibin yek. Divê em ti mirovên xwe tenê nehêlin.”
‘EGER EW NEBAN, PIRSGIRÊKA KURD NEDIHAT SER MASEYÊ’
Kudret Eryilmaz got, “Êşa me çiqasê giran be jî, ewqasê em bi hêvî ne û serbilind in.” Kudret Eryilmaz bang kir ku ev êşên li ser rêya aştî û azadiyê bi dawî bibin.
Kudret Eryilmaz ragihand ku berdêlên hatine dayîn ji bo siberojeke azad hatine dayîn û got, “Eger îro ciwanên Kurd xwe neavêtiban pêşiya vî agirî, niha meseleya Kurd jî li ser maseyê nedihat axaftin. Îro hemû cîhan gelê Kurd diaxive. Afirêner û kedkarên vê zarokên me ne. Bi saya wan cîhanê gelê Kurd nas kir. 45 sal in ev şer didome, piştî şerê Kobanê cîhanê em û daxwazên me dîtin. Em bi vê têkoşînê serbilind in.”
‘BILA ÊŞ BI DAWÎ BIBE’
Kudret Eryilmaz herî dawî ev tişt got, “Bila ev pêvajo bi başî û serketinê bi dawî bibe. Bila aştî were vê axê û êşa dilê dayikan bi dawî bibe. Bila hêsirên çavan bisekinin. Zarokên me yên mayî jî di nava azadî û aştiyê de li welêt jiyana xwe bidomînin. Xwestek û daxwaza me ya herî mezin ev e.”
