Komîsyona Welatiyên Tirkiyeyê ya Yekîtiya Ewropayê (EUTCC), der barê biryara ‘Mafê Hêviyê’ de ji Serokê Komîteya Wezîran a Konseya Ewropayê, Nûnerên welatên Konseya Ewropayê, Komîteya Pêşîlêgirtina Êşkenceyê (CPT) û nûnerên daîmî re name şand.
EUTCC’ê bang li Tirkiyeyê kir ku ji bo berpirsyariyên xwe bêyî derengmayîn bi cih bîne li gorî biryarên ku di Îlona 2024’an de girtiye demildest tevbigere.
EUTCC’ê ji sala 2004’an û vir ve bi piştgiriya komên siyasî yên Parlamanta Ewropayê derbarê pirsgirêka Kurd û pêvajoyên demokratîk ên li Tirkiyeyê de konferansên navneteweyî yên salane lidar dixe.
Di nameyê de hate bibîrxistin ku dewleta Tirkiyeyê ragihandiye ku ew ê “mafê hêviyê” nede Rêber Apo û girtiyên ku cezayên girankirî yên heta hetayê li wan hatiye birîn.
Di nameya ku bi îmzeya Seroka EUTCC’ê Prof. Karîane Westrheim hat şandin de, hat diyarkirin ku pêkanîna biryara ‘Mafê Hêviyê’ ne tenê ji bo mafên takekesî yên Rêber Apo di heman demê de ji bo çareseriya pirsgirêka Kurd jî xwedî girîngiyeke mezin e.
Bi taybetî, nameya ku ji Nûnerê Daîmî yê Îrlandayê li Konseya Ewropayê Ragnhildur Arnlijótsdóttir re hatiye şandin bi vî rengî ye:
“Birêz Ragnhildur Arnlijótsdóttir,
Komîsyona Welatiyên Tirkiyeyê ya Yekîtiya Ewropayê (EUTCC), têkildarê Tirkiyeyê li ser ‘Mafê Hêviyê’ ku yek ji pîvanên bingehîn ên Konseya Ewropayê ye xîtabî we dike.
Dadgeha Mafên Mirovan a Ewropayê (DMME) di Adara 2014’an de biryar da ku cezayên hepsê yên heta hetayê bêyî îhtîmala berdanê, binpêkirina xala 3’yemîn a Peymana Mafên Mirovan a Ewropayê ye. Di civîna we ya Îlona 2024’an de, hûn li ser mecbûriyeta bicîhanîna vê biryarê jî axivî.
Di plana xwe ya nû ya çalakiyê de ku pêşkêşî komîteya we hatiye kirin de Tirkiyeyê ragihand ku ew ê ‘Mafê Hêviyê’ nede Abdullah Ocalan û girtiyên ku cezayên girankirî yên heta hetayê li wan hatiye birîn.
Ev rewş pirsgirêkên mezin çêdike û nayê pejirandin. Wekî endamek Konseya Ewropayê û namzetek ji bo Yekîtiya Ewropayê Tirkiye mecbûr e ku biryarên Dadgeha Mafên Mirovan a Ewropayê bicîh bîne.
Ji ber ku di pêkanîna biryara DMME’yê ti gaveke berbiçav nehatiye avêtin, em bang li Komîteya Wezîran a Konseya Ewropayê dikin ku li gorî biryarên ku di Îlona 2024’an de hatine girtin, demildest tedbîran bigire da ku Tirkiye bêyî derengmayîn berpirsyariyên xwe bicîh bîne.
Pêkanîna biryara ‘Mafê Hêviyê’ ne tenê ji bo mafên takekesî yên Abdullah Ocalan, di heman demê de ji bo çareseriya siyasî ya pirsgirêka Kurd û demokratîkbûna welêt, di çarçoveya diyaloga di navbera Abdullah Ocalan û dewleta Tirkiyeyê de, ji bo misogerkirina aştiyê, girîng e.”
