Girtiyê nexweş Neytûllah Bayram (67) ê ku li Girtîgeha Hejmar 2 a Girtî ya Tîpa F a Kandira ya Kocaeliyê tê ragirtin, nayê tedawîkirin. Neytûllah Bayram ji ber nexweşiyên xwe neçar maye ku hemû diranên xwe bikşîne. Neytûllah Bayram ê ku bi gotinên ‘’em ê tedawî bikin’’ ev 11 sal in bêyî diran dijî û nexweşiyên wî yên kronîk hene, jiber van yekan gelekî kîloyan dide. Endamên malbata wî diyar kirin ku daxwazên seqkirinê bê bersiv dimînin û daxwaz dikin ku Neytûllah Bayram ji cihekî nêzîk re were sewqkirin û tedawiya wî were destpêkirin.
JI BER SIRGÛNÊ TEDAWIYA WÎ DI NIVIYÊ DE MA!
Endamên malbatê diyar kirin ku dema ku Neytûllah Bayram di girtîgehê de bi pirsgirêkên tenduristiyê yên gelekî cidî re rû bi û mane û bi taybetî jî tedawiya wî ya diranan bi salan e nehatiye temamkirin. Li gorî malbatê Neytûllah Bayram di sala 2014’an de li Girtîgeha Girtî ya Tîpa D a Amedê dest bi tedawiya împlantê kiriye. Malbatê da zanîn ku di çarçoveya vê tedawiyê de tevahiya diranên wî hatine kişandin û çar wîdayên împlandê hatine bicihkirin. Lê belê di dema tedawiyê de ew pêşiyê ji Girtîgeha Osmaniye piştre jî ji Girtîgeha Hejmar 2 ya Tîpa F a Kandirayê re hate sirgûnkirin. Ji ber van sirgûnkirinan tedawiya Neytûllah Bayram di nîviyê de maye û tevî ku malbatê gelek caran daxwaz kiriye jî ew daxwazên wan bê bersiv mane û ew neşandin Amedê.
EV 11 SAL IN BÊYÎ DIRAN DIJÎ!
Endamên malbata Neytûllah Bayram anî ziman ku ew ji sala 2015’an ve ye bêyî diran û li gel wîdayên împlantê dijî û diyar kirin ku di demên dawiyê de wan ji bo temamkirina tedawiya împlantê amûrên hewce şandine girtîgehê lê belê piştî salekê bi egera ku hestiyên çeneya wî gelek lawaz bûne û ji ber vê yekê tedawiya împlantê nehatiye kirin û ew amûr dubare şandine. Malbatê destnîşan kir ku ji ber temamnekirina tedawiyê ew nikare xwarinê bixwe, jê re xwarinên li gorî nexweşiya wî nayên dayîn û jiber vê yekê tim û tim kîloyan dide.
‘DIBE KU NEXWEŞIYÊN WÎ VEGUHERIN PENCEŞÊRÊ’
Endamên malbatê piştre gotin ku ji bilî pirsgirêkên diranan ji sala 2010’an ve ye ji ber birînên wî yên li ser mîde û gewriya wî tedawiyê dibîne û ev yek anîn ziman: ‘’Li Amedê dihat tedawîkirin lê belê ji ber piştî hate sirgûnkirin tedawiya wî di nîviyê de ma. Ger tedawiya wî ya mîde û gewriyê baş neyê kirin îhtîmala ku veguhere penceşêrê gelekî bilind e. Tevî ku me raporên hewce ji saziyên eleqedar re şandine jî tedawiya wî nayê kirin û daxwazên sewqkirinê bê bersiv dimînin. Sirgûnî girtîgeheke gelekî dûrî me kirin. Ji ber cezayê ku standiye bi tena serê xwe dimîne. Ev 10 sal in nikare dayîk û bavê xwe bibîne. Dayîk û bavê wî ji ber temenê xwe nikarin biçin girtîgehê.”
‘BILA JI CIHEKÎ NÊZÎK RE WERE SEWQKIRIN’
Endamên malbatê di dawiyê de dubare daxwazên xwe anîn ziman û gotin: ‘’Ew mehkûmî tecrîd û nexweşiyê kirin. Ji ber mîde, diran û gelek nexweşiyên xwe yên kronîk bi pirgirêkên mezin re rû bi rû maye. Tekane daxwaza me ew e ku ev yek werin çareserkirin. Yan bila tedawiya wî were kirin yan jî ji cihekî nêzîkî me re were sewqkirin.’’
