Ji destpêka êrîşên li ser Bakur-Rojhilatê Sûriyê, gelê Şengalê hem dest bi çalakiyên destekdayîna berxwedana Rojava kirin hem jî li ber metirsiya êrîşên nû yên li ser Şengalê dest bi amadekariyan kirin. Gelê Şengalê di ferqê de ye ku ev pîlana ku li Sûriyê bi destê Colanî ketiye meriyetê, dewama êrîşên qirkirinê yên 2014’an e. Ji bo hişyarkirin û rêxistinkirina gel, sazî û dezgehên Rêveberiya Xweser bi taybet jî meclîsên gel di nav liv û tevgerê de ne. Endamên meclîsên gel ên Şengalê diyar kirin ku ew heya dawiyê li gel berxwedana Rovayê Kurdistanê ne û ew careke din rê nadin zîhnîyeta DAIŞ’ê êrîşê Şengalê bike.
‘HIKUMETA ŞAMÊ HIKUMETA DAÎŞ’Ê YE’
Endamê Meclîsa Gel a Duhola Heyder Şengalî destnîşan kir ku şerê li ser Rojavayê Kurdistanê tê meşandin şerê li dijî mirovahiyê ye û got: “Hemû dinya dizane hikumeta Şamê, hikumeta DAIŞ’ê ye. Bi navê misilmantiyê, bêyî ferq û cudahî li ser Kurdan, Elewiyan, Durzî û Êzidiyan sûc dikin. Ev şer li dijî hemû gelan e. Weke Şengal û civaka Êzidî em ê piştevaniya gele xwe yê Rojava bikin, her wiha emê amadekariyan bikin ku eger şer bi ser me de hat em axa xwe biparêzin. Em nahêlin pîlana 2014’an careke din bi ser civaka Êzidî de were. Em niha ji hêza xwe, ji hêzên xwe yên parastinê bawer in. Herkesekî ku karibe jî divê çekan hilgire û li pişt hêzên xwe yên leşkerî bisekine.’’
‘DIVÊ ÊZIDÎ YEKÎTIYA XWE AVA BIKIN’
Endamê Meclîsa Gel a Borik Heyder Korkorkî jî piştevaniya gelê Rojava ya di dema fermanê de bibîrxist û wiha axivî: “Çawa ku di 2014’an de gelê Rojava piştevaniya Şengalê kir, niha divê civaka Êzidî jî piştevaniya gelê Rojava bike. Li hemberî xeteriya êrîşên li ser Şengalê jî divê hemû sazî û dezgehên Şengalê yekîtiya xwe ava bikin. Divê em yekîtîya xwe ava bikin û ev komploya ku bi destê Colanî li ser gelê Kurd û Êzidiyan tê ferzkirin, vala derxin. Amerîka vî şerî li ser gele Kurd, Êzidiyan û Şîayan dimeşîne, ev DAIŞ’iyên ku ji hepsên Sûriyê deranîn û anîne Iraqê, dixwazin bi vî awayî bikevin nav axa Iraqê jî.’’
‘CIVAKA ME DIVÊ PARASTINA XWE XURT BIKE’
Endamê Meclîsa Gel a Zorava Berekat Xelef, li hemberî êrîşên qirkirinê banga hişyariyê li civaka Êzidî kir û got: ‘’Ev şerê tê meşandin her bi navê DAIŞ’ê ye. Colanî kî bû, ew jî DAIŞ bû, di hepsê de bû. Lê dewletên Ewrûpî bêyî hilbijartinek ew anîn û danîn ser rêveberiya Sûriyê. Û dixwazin van êrîşan li hemû Rojhilata Navîn belav bikin. Civaka me divê piştgiriya hêzên xwe yên parastinê bike, ji bo parastina xwe çek rake û hişyar be.’’
‘DIVÊ GELÊ KURD Û CIVAKA ÊZIDÎ BIBE YEK’
Endamê Meclîsa Gel a Guhbel Xidir Xelef hikumeta Şamê weke hikumeta DAIŞ’ê bi nav kir û wiha dewam kir: ‘’Li dijî gelan şer tê meşandin. Reîsê Sûriyê Ehmed Şera bi xwe DAIŞ bû, êrîşê keç û jinên Êzidî kirin. Dewletên Yekbûyî yên Amerîkayê şîrikê vê rewşê ye û piştgiriyê dide DAIŞ’ê. Ev hemû sûcên ku tê kirin, DYA sebeb e. Ev êrîşên ku niha tê meşandin, li dijî Kurdistanê û zimanê Kurdî ye. Hemû zindanên ku çeteyên DAIŞ’ê lê hene, derî ji wan re vekirine. Eger Rojava çû Kurdistan namîne, lazim e gelê Kurd û civaka Êzidî bibin yek.’’
