Federasyona Demokratîk a Elewiyan (FEDA) û Yekîtiya Jinên Elewî yên Demokratîk (DAKB) di salvegera Fermanê de daxuyaniyeke nivîskî weşandin.
Di daxuyaniyê de hate gotin, “Em di salvegera komkujiya 3’yê Tebaxa 2014’an de ne, Fermana 74’an a li dijî gelê Êzidî. Di vê qirkirina sîstematîk a ku ji hêla DAÎŞ û çeteyên bi heman rengî ve hatî kirin de, bi hezaran Êzidî hatin qirkirin; jin hatin kolekirin û zarok wekî çekên şer hatin bikaranîn.
Êzidî, yek ji gelên herî kevnar ên dîrokê, li hember vê qirkirinê li ber xwe dan û bûn sembolên rûmeta mirovahiyê. Tevî her ferman û zilmê, ew ji xweliyê rabûn û destanên berxwedanê yên bêhejmar nivîsandin.
Hedefgirtina jinan ji hêla DAÎŞ’ê ve, armanc ew bû ku bi taybetî nirxên civaka Êzidî hilweşîne. Ev hovîtî li ber çavên cîhanê pêk dihat, bêdengiya dewletan dihat wateya hevkariya sûcên li dijî mirovahiyê.
Êzîdiyan xwe li Çiyayê Şengalê girtin û parastina xwe ava kirin; ligel şervanên YPG’ê, wan berxwedaneke dîrokî da meşandin. Ev berxwedan ne tenê ji bo Êzîdiyan, ji bo hemû gelên bindest bû hêvî.
Weke gelê Elewî ku heman êş, jiyane em êşa Êzîdiyan parve dikin û berxwedana wan weke rûmeta xwe dibînin. Me Fermana 74’an û kesên ku me winda kirin ji bîr nekiriye û em ê nehêlin ku were jibîrkirin. Em ê rêya jinên Êzîdî bişopînin, rastiya wan bînin ziman û bibin dengê wan.
Em ji bo pêşengên berxwedanê şervanên YPG’ê hurmetên xwe pêşkêş dikin û têkoşîna hemû gelên ku li dijî barbariyê li ber xwe didin silav dikin.
Îro, ne Elewiyan ji Haqê dûr ketine û ne jî Êzîdiyan dev ji Laleşê berdaye.”
