FEDA û DAKB’ê daxuyaniyeke hevpar dan û ev tişt diyar kirin: “Ji bo pêvajoya şer bi dawî bibe, pirsgirêka Kurd a qedîm ji zemînê tundiyê derbasî zemînê demokratîk û hiqûqî bibe, roja 27’ê Sibatê bang hate kirin. Em vê bangê dipejirînin û xwedî lê derdikevin.”
DEWLET DIVÊ XWE BIGUHERE
Di daxuyaniyê de ev tişt jî hatin diyarkirin: “Em bang li dewletê jî dikin ku ji bo avakirina civaka demokratîk, demildest gavên siyasî û hiqûqî yên pêwîst bavêje. Divê dewlet banga aştî û civaka demokratîk a Birêz Abdullah Ocalan cidî bigire û xwe biguhere. Ji bo civaka demokratîk û jiyana hevpar, me Elewiyan bi sedsalan berdêl daye. Elewî di tevahiya dîrokê de tevî zext, zilm û komkujiyên dewletê jî ti carî dest ji hesreta xwe ya heq, edalet û aştiyê bernedane. Her tim li dijî şer aştî pîroz dîtine û jiyana hevpar parastine. Çareseriya pirsgirêka Kurd û Elewiyan ku du pirsgirêkên qedîm ên Tirkiyeyê ne, bi sîstemeke siyasî ya ku civaka demokratîk û hiqûqa gerdûnî esas digire pêkan e.”
AVAKIRINA CIVAKA DEMOKRATÎK
Daxuyanî wiha bi dawî bû: “Di pêvajoya guhertina demokratîk de, divê em li gorî wezîfe û berpirsyariyên xwe tevbigerin. Bi vê baweriyê em bang li hemû tevger û rêxistinên Elewiyan dikin ku aştiya bi rûmet biparêzin û civaka demokratîk ava bikin.”
